នារី រ័ត្ន​គន្ធា បង្ហាញ​ខ្លួន​គួរឲ្យភ្ញាក់ផ្អើល​

3
Cambodia Website Design

គឺជា​រឿង​គួរឲ្យភ្ញាក់ផ្អើល ដែល​អតីត​តារា​សម្ដែង​ជើងចាស់ អ្នកនាង នារី រ័ត្ន​គន្ធា បាន​បង្ហាញ​ខ្លួន​ឲ្យគេ​ដឹងថា អ្នក​នាង​បាន​ចុះ​មក​លេង​ស្រុក​សារ​ជា​ថ្មី​នៅ​ដើមឆ្នាំ​២០១៥​នេះ ។ អ្នក​នាង​បាន​ទាំង​ឡើង​ផ្ដល់​បទសម្ភាសន៍​ជាមួយ​ស្ថានីយទូរទស្សន៍ CTN  កាលពី​យប់​ថ្ងៃ​ទី​២៨ ខែ​មករា​ទៀតផង ដែល​កិច្ចសម្ភាសន៍​នេះ​នឹង​ត្រូវ​ចាក់​ផ្សាយ​នៅ​CTN  និង​CNC នៅ​សប្ដាហ៍​ក្រោយ​។ 

​ឆ្លើយឆ្លង​តាម​ទូរ​សព្ទ​ជាមួយ​VOD  ក្រោយ​បញ្ចប់​សកម្មភាព​ថត​ក្នុង​កម្មវិធី «CTN  ប៉ុស្ដិ៍​លេខ​២១» របស់​អ្នកនាង​យុ​គ ចិន្តា អ្នកនាង នារី រ័ត្ន​គន្ធា ដែល​អ្នក​ណា​ក៏​ស្គាល់​ថា​ជា​តារា​សម្ដែង​ល្បីឈ្មោះ​កាល​ពី​អតីត​បានឲ្យដឹងថា អ្នកនាង​បាន​មក​ដល់​ប្រទេស​កម្ពុជា​តាំងពី​ថ្ងៃ​ទី​៦ ខែ​មករា ដើម្បី​មក​លេង​អ្នក​ម្ដាយ និង​បងប្អូន​ដែល​រស់នៅ​ស្រុក​ខ្មែរ ។ ជាមួយនឹង​ការកោតសរសើរ​ពី​ភាព​រីកចម្រើន​នៃ​វិស័យ​សិល្បៈ​ខ្មែរ អ្នកនាង​ប្រាប់ថា ខ្លួន​ចាស់​ហើយ គឺ​មិន​ចង់​ត្រឡប់​មក​កាន់​វិថី​នេះ​ដូច​មុន​ទៀត​ទេ បើទោះជា​កេរ្តិ៍ឈ្មោះ និង​ស្នាដៃ​នៅតែ​មាន​ការចាប់អារម្មណ៍​ច្រើន​នោះ​ក៏ដោយ​។

​អ្នកនាង​និយាយថា «​បង​មក​លេង​តើ​អូន អត់​មាន​ចង់​សម្ដែង​អី​វិញ​ទេ ប៉ុន្តែ​បង​ឡើង​សម្ភាសន៍​ឲ្យ​អ្នកនាង​យុ​គ ចិន្តា​ហ្នឹង ដោយសារតែ​គាត់​ទទូ​ចពេច និង កុំឲ្យ​មហាជន​ថា​យើង​បាត់ឈឹង​ពេក​តើ ព្រោះ​បង​មក​មុនៗ ធ្លាប់តែ​ឡើង​ច្រៀង​ប៉ុណ្ណោះ​»​។ អ្នកនាង​ចាត់ទុកថា ដំណើរ​មក​លេង​ស្រុក​លើក​នេះ ខុសប្លែក​ពី​លើក​មុនៗ​ដាច់​ឆ្ងាយ ដោយសារ​តែ​អ្នកនាង​បាន​សម្រេចចិត្ត​ទទួលយក​ការ​សម្ភាសន៍​ពី​រឿងរ៉ាវ​ឯកជន​ដាក់​កម្មវិធី​ទូរទស្សន៍​របស់​អ្នកនាង​យុគ ចិន្តា ដែល​កន្លងមក​មាន​តែ​ការទទូច​សុំ  ប៉ុន្តែ​មិន​ដែល​ទទួលយក​ក្រៅពី​ឡើង​ច្រៀង​បង្ហើរ​សំនៀង​តិចតួច ។​

Cambodia Website Design

​អ្នកនាង​យល់ថា ការឡើង​សម្ភាសន៍​ឲ្យ CTN  និង CNC  ដែល​បាន​បញ្ចប់​កាលពី​យប់​ថ្ងៃ​ពុធ​ទី​២៨ មករា​នោះ នឹង​ក្លាយជា​អនុស្សាវរីយ៍​មួយ មុន​ពេល​អ្នក​នាង​ត្រឡប់​ទៅ​អាមេរិក​វិញ ។ ប្រភព​ពី​ទូរទស្សន៍​CTN  បាន​អះអាង​ថា អ្នកនាង​សម្រេចចិត្ត​ទទួលយក​ការសម្ភាសន៍ គឺ​ដោយសារតែ​នៅ​អាមេរិក អ្នកនាង និង​ម្ដាយ​របស់​ពិធី​ការិនី យុ​គ ចិន្តា  មាន​ទំនាក់ទំនង​ល្អ​នឹង​គ្នា ហើយ​គាប់​ជួន​ជា​មាន​ការស្នើ​ពី​អ្នកនាង​យុ​គ ចិន្តា ប៉ុណ្ណោះ ទើប​សុខចិត្ត​ឡើង​សម្ភាសន៍ ដើម្បី​បង្ហាញ​ពី​ការវិវត្តន៍​ថ្មីៗ​នៅលើ​ទឹកដី​អាមេរិក​។ អ្នកនាង​ក៏​បាន​ឲ្យដឹង​ផង​ដែរ​ថា ការចុះ​មក​លេង​ស្រុក​ខ្មែរ​លើក​នេះ អ្នកនាង​មិនអាច​ស្នាក់​នៅ​យូរ​ទេ គឺ​នឹង​ត្រឡប់​ទៅ​សហរដ្ឋអាមេរិក​វិញ​នៅ​ថ្ងៃ​ទី​៥ ខែ​កុម្ភៈ ។​

​ពាក់ព័ន្ធ​នឹង​ជីវិត​ឯកជន អ្នកនាង​ប្រាប់ថា មិនទាន់​មាន​ពេល​បញ្ជាក់​លម្អិត​ដោយ​ផ្ទាល់មាត់​ជាមួយ VOD នោះទេ  ដោយសារតែ​ការទាក់ទង​សម្ភាសន៍​របស់​VOD  ចំ​ពេល​ដែល​អ្នកនាង​ជាប់រវល់ ។ អ្នកនាង​និយាយថា «​អូ​អូន​!​កុំ​ទាន់​អាល​សម្ភាសន៍​បង​បាន​អត់​អូន ព្រោះ​បង​ជាប់រវល់​បន្តិច  រឿង​អីៗ​អូន​អាច​ចាំ​មើល​ទូរទស្សន៍​(​កម្មវិធី​CTN ប៉ុស្ដិ៍​លេខ​២១) បាន​អត់​អូន ព្រោះ​បង​សម្ភាសន៍​ឲ្យអស់​ហើយ ឬក៏​អូន​ឯង ចាំ​ទាក់ទង​មក​បង មួយ​ម៉ោង​ពីរ​ម៉ោង​ទៀត​ទៅ​»​។ យ៉ាងណាក៏ដោយ អ្នកនាង​មិនបាន ទទួល​ទូរ​សព្ទ​ក្នុង​ការទាក់ទង​លើក​ក្រោយៗ​របស់​VOD នោះទេ ដែល​ទំនងជា​អ្នកនាង​នៅ​ជាប់រវល់​។​

នៅ​យប់​ថ្ងៃទី​២៨​នេះដែរ លោក អែន​ឌី ក៏​បាន​ដឹក​ដៃ អ្នកនាង សៀម ស្រី​ណុ​ច ដែល​ទើប​បង្ហាញខ្លួន​នៅក្នុង​ពិធី​កាត់​ចំណងដៃ​របស់​តារាចម្រៀង ឆ័យលី ដាឡែន ឡើង​សម្ភាសន៍​ក្នុង​កម្មវិធី «CTN ប៉ុស្ដិ៍​លេខ​២១» ដូចគ្នា បើទោះជា​អតីតា​តារា​ស្រី​រូប​នេះ​ហាក់​ខ្លាច​ឆាក និង​អះអាងថា​មិន​ចង់​ឡើង​សម្ភាសន៍ ឬ​បង្ហាញខ្លួន​នៅលើ​កញ្ចក់​ទូរទស្សន៍ ។ លោក​បាន​ជួប​ផ្ទាល់​ជាមួយ​អ្នកនាង​ក្នុងពេល​ថត​កម្មវិធី​នៅ​យប់នោះ តែ​លោក​មិន​បាន​ស្ដាប់​សាច់​រឿង​ពាក់ព័ន្ធ​នឹង​ជីវិត​ឯកជន​របស់​អ្នកនាង នារី រ័ត្ន​គន្ធា នោះទេ ដោយសារ​តែ​ពេល​លោក​ទៅដល់ គឺ​អ្នកនាង​បាន​សម្ភាសន៍​ចប់​ក្នុង​វគ្គ​ទី​១​ជាមួយ​អ្នកនាង​យុ​គ ចិន្តា​ទៅហើយ ។ ម្យ៉ាង​មកពី​លោក​ត្រូវ​ប្រញាប់​ចូល​សម្ភាសន៍ ក្នុង​វគ្គ​ទី​២ ជាមួយ​អ្នកនាង យុ​គ ចិន្តា នោះ​ផង ទើប​មិន​បាន​សួរ​នាំ​គ្នា​ច្រើន ក្រៅ​ពី​បាន​ថតរូប​ជាមួយគ្នា​ប៉ុន្មាន​សន្លឹក ។​

​លោក​អែន​ឌី និយាយថា «​ភ្ញាក់​បង ព្រោះ​យប់​ដែល​ខ្ញុំ ទៅ​ថត​កម្មវិធី​ឲ្យ​បង​យុ​គ (​ចិន្តា​)​ហ្នឹង ខ្ញុំ​ស្មានថា​បាន​ជួប​តែ សៀម ស្រី​ណុ​ច ដែល​ជា​តារា​បាត់​មុខ​យូរ​តែ​ម្នាក់​ទេ ប៉ុន្តែ​មានអី​ពេល​ទៅ​ដល់​ស្រាប់តែ​ឃើញ​គាត់ (​នារី រ័ត្ន​គន្ធា​) ម្នាក់ទៀត​» ។ លោក​សរសើរ​ថា តារា​ជើងចាស់​រូបនេះ  នៅតែ​ស្អាត​បើ​ទោះ​ជា​បាន​បែក​សាច់ មើល​ទៅ​ធាត់​ជាង​មុន ហើយ​អ្វី​ដែល​គួរឲ្យកត់សម្គាល់ គឺ​អ្នកនាង​នៅតែ​មាន​ភាព​រួសរាយ​រាក់ទាក់​ចំពោះ​តារា​សិល្បៈ​ជំនាន់​ក្រោយ បើ​ទោះ​អ្នកនាង​បាន​ក្លាយ​ជា​តារា​រៀមច្បង ដែល មិនសូវមាន​ទំនាក់ទំនង​ជាមួយ​តារា​ស្រករ​ក្រោយ​។

​ការបង្ហាញ​ខ្លួន​របស់​អ្នកនាង នារី រ័ត្ន​គន្ធា បាន​ធ្វើឲ្យ​មាន​ការចាប់អារ​ម្មណ៍​ខ្លាំង ខណៈ​ដែល កម្មវិធី «CTN ប៉ុស្ដិ៍​លេខ​២១» ដែល​គ្រោង​ចាក់​ផ្សាយ​យប់​ថ្ងៃ​ពុធ​សប្ដាហ៍​ក្រោយ ក៏ត្រូវ​CTN រំពឹងថា នឹង​មាន​អ្នក​រង់ចាំ​ទស្សនា​ច្រើន ដោយសារ​តែ​ម្នាក់ៗ​ចង់ដឹង​ពី​ការវិវត្តន៍​ថ្មី​របស់​អតីត​តារា​ល្បី​រូបនេះ ៕

ប្រភព៖ http://vodhotnews.com/27007

Comments

comments

You might also like More from author