Freedom House ថា​កម្ពុជា​ជា​ប្រទេស មិន​មាន​សេរីភាព

0
Cambodia Website Design

ភ្នំពេញៈ បន្ទាប់​ពី​មាន​របាយ​ការណ៍​នៃ​អំពើ​ពុក​រលួយ និង​ការ​បង្ក្រាប​ជា​ច្រើន ទៅ​លើ​​អ្នក​ប្រឆាំង​នៅ​ក្នុង​ប្រទេស​កម្ពុជា កាល​ឆ្នាំ​មុន ប្រទេស​កម្ពុជា​ជា​ថ្មីម្តង​ទៀត​ ត្រូវ​បាន​ដាក់​ចំណាត់​ថ្នាក់​ដោយ​អង្គការ​​ឃ្លាំ​មើល​សកល Freedom House ថា​ «មិន​មាន​សេរីភាព» នៅ​ក្នុង​របាយការណ៍​មួយ​ដែល​ចេញ​កាល​ពី​ថ្ងៃ​ពុធ។

នៅ​ក្នុង​របាយការណ៍​ដែល​មាន​ចំណង​ជើង​ថា​ «សេរីភាព​នៃ​ពិភព​លោក ២០១៥» ការ​វាយ​តម្លៃ​របស់​អង្គការ Freedom House ​អំពី​សិទ្ធិ​នយោបាយ​នៃ​​ពិភព​លោក​និង​សេរីភាព​ស៊ីវិល​​​របស់​ប្រជាពលរដ្ឋ​ទូទាំង​ពិភព​លោក​នៅ​ក្នុង​ឆ្នាំ​ ២០១៤ កម្ពុជា​បាន​ទទួល​ពិន្ទុ​មធ្យម​ចំនួន​ ៥,៥ ក្នុង​ចំណោម​ពិន្ទុ ៧ ដែល​ពិន្ទុ​ ១ ​តំណាង​ថា ​ជា​ប្រទេស​មាន​សេរីភាព​បំផុត​និង​ ៧ ជា​ប្រទេស​មាន​សេរីភាព​តិច​បំផុត។

លោក William Ford មន្ត្រី​កម្មវិធី​ប្រចាំ​អាស៊ីអាគ្នេយ៍​នៃ​អង្គការ Freedom House បាន​ថ្លែង​ថា៖ «យើង​មិន​ឃើញ​ថា​ឆ្នាំ​ ២០១៤ ជា​ឆ្នាំ​ល្អ​ក្នុង​ប្រទេ​ស​កម្ពុជា​ទេ។ ប្រទេស​នេះ​ត្រូវ​បាន​ដាក់​ចំណាត់​ថ្នាក់​ថា​ជា​ប្រទេស​មួយ​ក្នុង​ចំណោម​ប្រទេស​ព្រៃ​ផ្សៃ​បំផុត​នៅក្នុង​ពិភព​លោក​ និង​មិន​មាន​សេរីភាព​យ៉ាង​ហោច​ណាស់​ ២០ ​ឆ្នាំ​នៅ​ក្នុង​​ការ​ដាក់​ចំណាត់​ថ្នាក់​របស់​ Freedom House»។

Cambodia Website Design

ការ​ដាក់​ចំណាត់​ថ្នាក់​នេះ​គឺ​ផ្អែក​ទៅ​លើ​សូចនាករ​លម្អិត​ចំនួន​ ២៥ ក្នុង​ការ​វាយ​តម្លៃ​ រួម​មាន​ដូច​ជា​ដំណើរ​ការ​នៃ​ការ​បោះឆ្នោត សេរីភាព​នៃ​​ការ​ចូល​រួម​​នយោបាយ សេរីភាព​នៃ​ការ​បញ្ចេញ​មតិ ​និង​ជំនឿ​នីតិរដ្ឋ​ស្វ័យភាព​បុគ្គល​ និង​សិទ្ធិ​បុគ្គល។
បើទោះ​បី​​ជា​ពិន្ទុ​​របស់​ប្រទេស​កម្ពុជា​នៅ​តែ​ដូច​ឆ្នាំ​មុន លោក William Ford បាន​ថ្លែង​ថា ការ​ធ្លាក់​ចុះ​ខ្លាំង​ស្តីពី​សេរី​ភាព​មូល​ដ្ឋាន​ ​សិទ្ធិ​របស់​ស៊ីវិល​ក្នុង​ការ​គាំទ្រ​នយោបាយ បង្ហាញ​ថា​ កម្ពុជា​កំពុង​ធ្លាក់​ចេញ​ពី​ផ្លូវ​នៃ​ប្រជា​ធិបតេយ្យ។

លោក​បន្ត​ថា៖ «បន្ទាប់​ពី​ព្រឹត្តិការណ៍​ជុំវិញ​ការ​បោះឆ្នោត​ឆ្នាំ ​២០១៣ យើង​ឃើញ​មាន​ការ​បង្ក្រាប​មួយ​ទៀត​ទៅ​លើ​សេរី​ភាព​នៃ​ការ​ប្រមូល​ផ្តុំ​និង​ការ​បញ្ចេញ​មតិ​នៅ​ក្នុង​ប្រទេស​​នេះ​ ក្នុង​នោះ​មាន​​សោកនាដកម្ម​នៅ​ផ្លូវ​ វេងស្រេង ​ដែល​បាន​សម្លាប់​មនុស្ស​យ៉ាង​ហោច​ណាស់​ ៥ នាក់​នៅ​ក្នុង​ការ​តវ៉ា​កាល​ខែ​មករា និង​ការ​ដាក់​ពន្ធនាគារ​​សកម្ម​ជន​សិទ្ធិ​ដីធ្លី​ជា​ច្រើន​ទៀត»។

ទោះ​យ៉ាង​ណា​ប្រទេ​ស​នេះ​ មាន​ភាព​ប្រសើរ​ឡើង​ខ្លះដែរ ដូចជា​​ការ​ចូល​រួម​ផ្នែក​នយោបាយ​ក្នុង​ចំណោម​សាធារណជន​ជា​ពិសេស​ក្នុង​ចំណោម​យុវវ័យ​និង​សង្គម​ស៊ីវិល ដោយសារ​ប្រព័ន្ធ​ផ្សព្វ​ផ្សាយ​ក្នុង​សង្គម​ខ្លាំង​ជាង​មុន។

នាយក​ប្រតិបត្តិ​នៃ​អង្គការ​តម្លាភាពកម្ពុជា​ លោក ព្រាប កុល បាន​ថ្លែង​ថា ការ​ពិភាក្សា​បើកជា​ចំហ​អំពី​ច្បាប់​ស្តីពី​លទ្ធភាព​ទទួល​បាន​ព័ត៌មាន អាច​ជា​​ការ​បង្ហាញ​អំពី «ភាព​ប្រសើរ​ឡើង​មួយ​ចំនួន​​ នៅ​ក្នុង​ទស្សន​វិស័យ​នៃ​សេរីភាព​និង​សិទ្ធិ​ទទួល​បាន​ព័ត៌មាន​ក្នុង​ប្រទេស​កម្ពុជា»។

លោក Ford ​បាន​ថ្លែង​ថា ផ្នែក​រីក​ចម្រើន​មួយ​ទៀត​គឺថា​ គណៈកម្មាធិការ​ជាតិ​រៀប​ចំ​ការ​បោះឆ្នោត គ្រោង​​ធ្វើ​កំណែ​ទម្រង់​ដំណើរ​ការ​បោះឆ្នោត។

គណបក្ស​ធំ​ពីរ​របស់​កម្ពុជា​ បច្ចុប្បន្ន​នេះ​កំពុង​ធ្វើ​លើ​សេចក្តី​ព្រាង​ច្បាប់​ គ.ជ.ប ​ថ្មី​​ដែល​នឹង​សើរើ​ប្រព័ន្ធ​បោះឆ្នោត​បន្ទាប់​ពី​មាន​ការ​សង្ស័យ​ថា មាន​ការ​ក្លែង​បន្លំ​ឈ្មោះ​អ្នក​បោះឆ្នោត​នៅ​ក្នុង​ការ​បោះឆ្នោត​ជាតិ​ឆ្នាំ​២០១៣។

លោក Ford បន្ត​ថា៖ «គេ​នៅ​ចាំ​មើល​ទៀត​ថា​តើ​​ការ​​ផ្លាស់​ប្តូរ​​ទាំង​នេះ​អាច​បំបែក​ភាព​ជាប់​គាំង​នយោបាយ​យ៉ាងណា និង​ថា​តើ​ គ.ជ.ប ​អាច​ធានា​​ឯករាជ​ភាព​របស់​ខ្លួន​យ៉ាង​ណា​?»។

លោក ទេព នីថា អគ្គលេខាធិការ គ.ជ.ប​ បាន​​ឆ្លើយតប​ដោយ​ថ្លែង​ថា វា​មិន​អាច​ទៅ​រួច​ទេ​ឲ្យ​ គ.ជ.ប ឯក​រាជ្យ​ទាំង​ស្រុង​ ប៉ុន្តែ​ គ.ជ.ប កំពុង​ព្យាយាម​​អនុវត្ត​​ច្បាប់​បោះឆ្នោត​​យ៉ាង​យុត្តិធម៌​​និង​អស់​ពី​សមត្ថភាព​របស់​ខ្លួន។ «យើង​អាច​និយាយ​ថា​ គ.ជ.ប យុត្តិធម៌ ប៉ុន្តែ​យើង​មិន​អាច​និយាយ​ថា វា​ឯករាជ្យ ១០០ ភាគរយ​ទេពី​ព្រោះ​សមាជិក​របស់​វា​ត្រូវ​បាន​ជ្រើស​រើស​ឡើង​ដោយ​គណបក្ស​ប្រជាជន​និង​គណបក្ស​សង្គ្រោះ​ជាតិ»។

បើ​តាម​លទ្ធផល​រក​ឃើញ​របស់ Freedom House បាន​ឲ្យ​ដឹងថា បើ​ទោះ​បី​ជា​មាន​ភាព​រីក​ចម្រើន​ទាំង​នេះ​ក៏​ដោយ​ វា​ក៏​មាន​ការ​ខក​ចិត្ត​ខ្លាំង​ឡើង​ផងដែរ អំពី​ភាព​អសមត្ថភាព​របស់​គណបក្ស​សង្គ្រោះ​ជាតិ​ក្នុង​ការ​ទទួល​ស្គាល់​ពី​តម្រូវ​ការ​តំណាង​រាស្រ្ត​របស់​ខ្លួន​ដើម្បី​ទទួល​បាន​អត្ថ​ប្រយោជន៍​នយោបាយ​ផ្ទាល់​របស់​ខ្លួន។

ប៉ុន្តែ​តំណាង​រាស្រ្ត​គណបក្ស​សង្គ្រោះ​ជាតិ លោក សុន ឆ័យ ថ្លែង​ថា ដោយសារ​​តែ​បរិយា​កាស​នយោបាយ​ «អាក្រក់» គណបក្ស​​ប្រឆាំង​​ត្រូវ​បង្ខំ​ចិត្ត​ទទួល​យក​ជំហាន​តូច​ជាង​មុន​ក្នុង​ការ​​ឆ្ពោះ​ទៅ​រក​ការ​ផ្លាស់​ប្តូរ។

លោក ឆ័យ បាន​ថ្លែង​ថា៖ «យើង​មិន​មាន​ស្ថាប័ន​ដែល​អាច​ជឿ​ជាក់​បាន​ដែល​អាច​ឲ្យ​គណបក្ស​ប្រឆាំង​អនុវត្ត​តួនាទី​របស់​ខ្លួន​… ​ពី​ព្រោះ​នៅ​ពេលយើង​ចាប់​ផ្តើម​លើក​ឡើង​នូវ​ក្តី​បារម្ភ​ ​យើង​ទទួលរង​ការ​គំ​រាម​កំហែង​ តំណាង​រាស្រ្ត​របស់​យើង​ត្រូវ​បាន​ដាក់​ពន្ធនាគារ​ហើយ​ស្ថានភាព​គឺ​កាន់​តែ​អាក្រក់​ទៅ»។

ដើម្បី​ធ្វើ​ឲ្យ​ស្ថាន​ភាព​សេរីភាព​ក្នុង​ប្រទេស​កម្ពុជា​ប្រសើរ​ឡើង លោក Ford បាន​​ផ្តល់​អនុសាសន៍​ថា សេរី​ភាព​អនឡាញ​គួរ​បើក​ចំហ​មិន​ស្ថិត​ក្រោម​ច្បាប់​គាប​សង្កត់។

លោក Ford​ ​បាន​ថ្លែង​ថា ​វា​លឿន​ពេក​ មិន​ទាន់​​ធ្វើ​ការ​ព្យាករ​បាន​ថា តើ​ស្ថានភាព​នៃ​សេរី​ភាព​ក្នុង​ប្រទេស​កម្ពុជា​នឹង​យ៉ាង​ណា​ទេ​ក្នុង​ឆ្នាំ ២០១៥ ប៉ុន្តែ​វា​អាច​ជា​ក្តី​បារម្ភ​តាម​រយៈ​ការ​បង្ហាញ​ដូច​ជា​ការ​កាត់​ទោស​​ទៅ​លើ​សកម្ម​ជន​បឹងកក់​និង​ព្រះ​សង្ឃ​ ១ អង្គ​ត្រូវ​បាន​តម្កល់​ដោយ​សាលា​ឧទ្ធរណ៍។

លោក​ រដ្ឋ​មន្រ្តី​ក្រសួង​ព័ត៌មាន ខៀវ កាញារីទ្ធ និង​ជា​អ្នក​នាំ​ពាក្យ​របស់​គណបក្ស​ប្រជាជន​កម្ពុជា​មិន​មាន​ការ​ឆ្លើយតប​ទេ៕

You might also like More from author

Leave A Reply

Your email address will not be published.