ចុងភៅ​ខ្មែរ​ឆ្នើម​​ ៥ ​រូប​ចូលរួម​ប្រកួត​ធ្វើ​ម្ហូប​នៅ​ប្រទេស​ថៃ

1
Cambodia Website Design

សៀមរាបៈ ក្រុម​ចុងភៅ​តំណាង​កម្ពុជា​ចំនួន ៥ ​រូប (ស្រី​ ២) បាន​ចូលរួម​កម្មវិធី​ប្រកួតប្រជែង​ចុងភៅ​អន្តរជាតិ​លើក​ទី​ ៤ ឬ​ព្រឹត្តិការណ៍ The 4th Thailand Ultimate Chef Challenge​ 2015 ​ប្រារព្ធ​​ធ្វើ​នៅឯ​ទីក្រុង​បាងកក ប្រទេស​ថៃ​កាលពី​ថ្ងៃ​ទី​ ២០ ឧសភា​ម្សិលមិញ និង​បន្ត​រហូត​ដល់​ថ្ងៃ​ទី​ ២៤ ខែ​ឧសភា ដោយ​មាន​លោក ឡុង បូរ៉ា អនុប្រធាន​សមាគម​ចុងភៅ​កម្ពុជា ជា​តំណាង​អ្នកដឹកនាំ​ក្រុម​។

លោក វិញ សាន អនុប្រធាន​សមាគម​ចុងភៅ​កម្ពុជា (CCA) បាន​ប្រាប់​ភ្នំពេញ​ប៉ុស្តិ៍​ឲ្យ​ដឹង​ថា៖ «​ចុងភៅ​ទាំង​ ៥ ​រូប​នោះ យើង​ចែក​ជា​បី​ក្រុម​សម្រាប់​​ព្រឹត្តិការណ៍ Thailand Ultimate Chef Challenge​ 2015។

ក្រុម​ទី​មួយ​មាន​បី​នាក់​ចូលរួម​កម្មវិធី Mekong Chef Challenge 2015 (​ប្រុស ២ ស្រី ១ ) ខណៈ​ក្រុម​ទី​ពីរ​មាន​ម្នាក់​ចូលរួម​កម្មវិធី Young Chef Challenge 2015 (ប្រុស ១ ) និង​ក្រុម​ទី​បី​មាន​ម្នាក់​ចូលរួម​កម្មវិធី Global Chef Challenge 2015 (ស្រី​ ១ -សោម ចិន្តា)»។

Cambodia Website Design

លោក វិញ សាន ក៏​បាន​បង្ហើប​ឲ្យ​ដឹង​ពី​មុខម្ហូប​ខ្មែរ​​មួយ​ចំនួន​សម្រាប់​ការ​ប្រកួត​នោះ​ដែរ​ថា៖ «លើក​នេះ​ខាង​ក្រុម​ចុងភៅ​កម្ពុជា​យើង​បាន​ត្រៀម​មុខម្ហូប​ដូចជា ញាំ​កំពឹស​ក្រអៅឈូក​ត្របែក ស្លប្រហើរ​ល្ពៅ ចំហុយ​ត្រី​អណ្តែង​ជ្រលក់​ទឹកត្រី​អម្ពិលទុំ បង្កង​បំពង​ជ្រលក់​ទឹកម្ទេស បាយលីង​ត្រីផាត់ និង​ប្រហិត​សាច់ត្រី-អន្ទង់-កង្កែប​ទ្រង់​គ្រឿង​ជាដើម»។

ការ​ប្រកួត Thailand Ultimate Chef Challenge នេះ​រៀបចំ​ឡើង​ដើម្បី​បើក​ឱកាស​ឲ្យ​ក្រុម​ចុងភៅ​ដែល​ស្ថិត​ក្នុង​ប្រទេស​នៃ​តំបន់​ទន្លេមេគង្គ និង​អនុតំបន់​ទន្លេមេគង្គ​ចូលរួម​ប្រកួត​ស្នាដៃ​ធ្វើម្ហូប​ដ៏ប៉ិនប្រសប់​របស់​ខ្លួន​ដោយ​កែច្នៃ​សាច់​សត្វ​មច្ឆា​ទន្លេ​មេគង្គ​មក​ធ្វើ​ជា​ម្ហូប​។

កាល​ឆ្នាំ ២០១៤ ក្រុម​ចុងភៅ​កម្ពុជា​បាន​ឈ្នះ​ពាន​មាស និង​មេដាយ​មាស ខណៈ​ឆ្នាំ ២០១៣ ក៏​បាន​ឈ្នះ​មេដាយ​មាស​ដូច​គ្នា​។

លោក វិញ សាន មាន​ក្តីរំពឹង​ទុក​ថា៖ «សង្ឃឹម​ថា ពួកគាត់​ទាំង​ប្រាំ​រូប​នឹង​ខិតខំ​បញ្ចេញ​ថ្វីដៃ​ដ៏ចំណាន​របស់​ខ្លួន​ក្នុង​ការ​ដំណ្តើម​យក​ជ័យជម្នះ​ឲ្យ​កម្ពុជា​ដូច​នៅ​ឆ្នាំ​មុនៗ​នេះ​ផង​ដែរ​»។

ការ​ប្រកួត​​នេះ ក្រុម​ចៅក្រម​ផ្តល់​ពិន្ទុ​​បាន​ផ្តោត​សំខាន់​ទៅលើ​ប្រាំ​ចំណុច គឺ​ផ្នែក​រសជាតិ ៥០ ពិន្ទុ ការ​រៀបចំ​មាន​ ១០ ពិន្ទុ អនាម័យ​ ២០ ​ពិន្ទុ ​ពេលវេលា ១០ ​ពិន្ទុ និង​​​ការ​សហការ​គ្នា​ក្នុង​ក្រុម​ ១០ ​ពិន្ទុ សរុប​ស្មើ​នឹង​ ១០០ ​ពិន្ទុ​។

ការ​ប្រកួត​ឆ្នាំ​នេះ ក្រុម​ចុងភៅ​ចូលរួម​សរុប​​ ៥០០ ​​នាក់ ដោយ​ ៥០ ​ភាគរយ​ជា​ថៃ រីឯ​ការ​វាយតម្លៃ​វិញ​​មាន​ក្រុម​ចៅក្រម​ផ្តល់​ពិន្ទុ​សរុប​ចំនួន​ ២០ ​​រូប ដោយ​​ ១០ ​រូប​ជា​ចៅក្រម​អន្តរជាតិ​៕

You might also like More from author

Comments are closed.