ការ​ផ្តល់​ដី​សម្បទាន​ជា​ប្រភព​ធ្វើឲ្យ​មាន​ជម្លោះ​ដីធ្លី

0
Cambodia Website Design

ភ្នំពេញៈ តំណាង​​សហគមន៍​អង្គការ​សង្គម​ស៊ីវិល និង​សមាជិក​រដ្ឋសភា​បន្ត​ជំរុញ​ឲ្យ​រាជរដ្ឋាភិបាល​ និង​អាជ្ញាធរ​ពាក់ព័ន្ធ​ពន្លឿន​​ការ​ដោះស្រាយ​​ជម្លោះ​ដីធ្លី​ដែល​​មិន​ទាន់​បាន​ដោះស្រាយ​ជាង ៣០០ ករណី​ខណៈ​ដែល​​​ការ​​វិភាគ​​ស្ថិតិ​​មួយ​នៅ​ឆ្នាំ​ ២០១៤ ​​​រកឃើញ​​ថា​មូលហេតុ​ចម្បង​ដែល​ធ្វើឲ្យ​កើត​មាន​​ជម្លោះ​ដីធ្លី​គឺ​ដោយសារ​​រដ្ឋាភិបាល​បាន​ផ្តល់​ដីសម្បទាន​សេដ្ឋកិច្ច​ទៅ​ឲ្យ​ក្រុមហ៊ុន​ឯកជន​ដែល​បាន​​ធ្វើឲ្យ​ប៉ះពាល់​ដល់​ពលរដ្ឋ​​ជាង ១៧០០០ គ្រួសារ​។

ការ​ជំរុញ​នេះ​បាន​ធ្វើ​ឡើង​នៅក្នុង​សិក្ខា​សាលា​​ផ្សព្វផ្សាយ​របាយការណ៍​ «ការ​វិភាគ​ស្ថិតិ​ស្តីពី​វិវាទ​ដីធ្លី​នៅ​កម្ពុជា​ឆ្នាំ ២០១៤» របស់​វេទិកា​នៃ​អង្គការ​មិនមែន​រដ្ឋាភិបាល​ស្តីពី​កម្ពុជា (NGO Forum) ដែល​​ធ្វើ​ឡើង​នៅ​ភោជនីយដ្ឋាន​​ទន្លេ​បាសាក់​ ២ រាជធានី​ភ្នំពេញ​កាលពី​ម្សិលមិញ​។

របាយការណ៍​វិភាគ​បាន​​លើក​ឡើង​​ថា​នៅ​ឆ្នាំ​ ២០១៤ វិវាទ​ដីធ្លី​មាន​ចំនួន ៣៥២ ករណី​ក្នុង​នោះ ៦៨ ករណី​ត្រូវ​បាន​​ដោះស្រាយ​ទាំង​ស្រុង​ហើយ​រាជធានី​​ភ្នំពេញ​នៅ​​តែ​ជា​កន្លែង​​ដែល​មាន​អត្រា​វិវាទ​ដីធ្លី​កើតឡើង​ខ្ពស់​បំផុត​បើ​ធៀប​​នឹង​​បណ្តា​​រាជធានី​ខេត្ត​ទាំង​ ២៥ ​ដែល​មាន​បញ្ហា​ជម្លោះ​​ដីធ្លី។

Cambodia Website Design

របាយការណ៍​ថា៖«សម្បទាន​ដី​សេដ្ឋកិច្ច​គឺជា​មូលហេតុ​ចម្បង​នៃ​វិវាទ​ដីធ្លី​ដែល​គិត​មក​ដល់​ខែ​កញ្ញា​នេះ​វិវាទ​ដីធ្លី​មាន​ចំនួន​ខ្ពស់​រហូត​ដល់ ៨៦ ​ករណី​ដែល​បណ្តាល​មកពី​ដីសម្បទាន​សេដ្ឋកិច្ច​ហើយ​តាមរយៈ​វិវាទ​នេះ​មាន​​ពលរដ្ឋ​ចំនួន ១៧ ១៥០ គ្រួសារ​ស្មើ​នឹង​​ចំនួន ៧៨ ៨៩០ ​នាក់​ដែល​រង​ផល​ប៉ះពាល់»។

របាយការណ៍​វិភាគ​នេះ​បាន​បញ្ជាក់​ថា​ចំនួន​វិវាទ​ដីធ្លី​​ក្នុង​ឆ្នាំ​ ២០១៤ មាន​ការ​ថយ​ចុះ​បើ​ធៀប​ទៅ​នឹង​ករណី​ដែល​បាន​កត់ត្រា​នៅ​ឆ្នាំ​​កន្លង​ទៅ​ប៉ុន្តែ​បញ្ហា​​នេះ​ត្រូវ​បាន​គេ​មើល​ឃើញ​ជាទូទៅ​ថា​ជា​បញ្ហា​មួយ​ក្នុង​បណ្តា​បញ្ហា​ប្រឈម​ដ៏ធំ​បំផុត​ចំពោះ​ប្រជាពលរដ្ឋ​កម្ពុជា​។

តំណាង​សហគមន៍​​ភូមិ​សង្គម​ថ្មី​ខេត្ត​ពោធិ៍សាត់​អ្នកស្រី យ៉ុង រ៉ាន់ បាន​ឲ្យ​ដឹង​ថា​ពួកគាត់​​បាន​រងគ្រោះ​​បាត់បង់​ដីធ្លី​ផ្ទះ​សម្បែង​តាំងពី​ឆ្នាំ​ ២០១០ ​មក​ក្រោយពី​​រាជរដ្ឋាភិបាល​បាន​ផ្តល់​ដីសម្បទាន​សេដ្ឋកិច្ច​ឲ្យ​​ក្រុមហ៊ុន​​វិនិយោគ។ អ្នកស្រី​បន្ត​ថា​បច្ចុប្បន្ន​ពួកគាត់​​​រស់នៅ​ក្រោម​ដំបូល​​​វត្តអារាម និង​​​ស្នាក់នៅ​ផ្ទះ​បង​ប្អូន​ហើយ​ខ្លះ​ទៀត​ត្រូវ​បង្ខំ​ចិត្ត​​ធ្វើ​​ចំណាកស្រុក​ខណៈ​ដែល​វិវាទ​​នេះ​​នៅ​មិន​ទាន់​បាន​ដោះស្រាយ​​នៅ​ឡើយ​។

ស្ត្រី​​ដែល​មាន​ស្វាមី​ជា​ជនពិការ​រូប​នេះ​បាន​​​​អំពាវនាវ​ទាំង​ទឹក​ភ្នែក​ថា៖ «សូម​ឲ្យ​អាជ្ញាធរ​ឆ្វៀល​ដី​ពួក​ខ្ញុំ​ចេញ​ពី​ដី​សម្បទាន​សេដ្ឋកិច្ច​របស់​​ក្រុមហ៊ុន MBS សុំ​ប័ណ្ណ​កម្មសិទ្ធិ​ស្រប​ច្បាប់​ដូច​ប្រជាពលរដ្ឋ​ដទៃ​ទៀត​ផង​ព្រោះ​ជីវិត​ពួកខ្ញុំ​វេទនា​ណាស់»។

នាយក​​ប្រតិបត្តិ​អង្គការ​ NGO Forum លោក តឹក វណ្ណារ៉ា បាន​ថ្លែង​ថា​គិត​ពី​ឆ្នាំ​ ២០១៤​ មក​ដល់ ៨ ​ខែ​ឆ្នាំ​ ២០១៥ ​​នេះ​នៅ​មាន​​បញ្ហា​ជម្លោះ​ដីធ្លី​ចំនួន ៣១៥ ករណី​ទៀត​ដែល​អាជ្ញាធរ​នៅ​មិន​ទាន់​​បាន​ដោះស្រាយ​ដែល​ធ្វើឲ្យ​ពលរដ្ឋ​រងគ្រោះ​បាន​និង​កំពុង​ប្រឈម​នឹង​ការ​បណ្តេញ​ចេញ​ដោយ​ពុំ​មាន​សំណង​សមរម្យ។

លោក​​បាន​ស្នើ​ឲ្យ​​រាជរដ្ឋាភិបាល​ពន្លឿន​​ការ​ដោះស្រាយ​វិវាទ​ដីធ្លី​ដែល​​នៅ​សេសសល់​បង្កើន​​តម្លាភាព​ក្នុង​​ចំណាត់ការ​តុលាការ​បញ្ឈប់​ការ​ចាប់​ខ្លួន​សមាជិក​សហគមន៍​បញ្ឈប់​​ការ​​ប្រើប្រាស់​កម្លាំង​យោធា ឬ​នគរបាល​ដើម្បី​ការពារ​​ដី​​ដែល​បាន​កាន់កាប់​ដោយ​សម្បទានិក និង​ត្រូវ​​វាយតម្លៃ​ផល​ប៉ះពាល់​បរិស្ថាន និង​សង្គម​មុន​នឹង​អនុម័ត​លើ​គម្រោង​​ណា​មួយ​​។

ដោយ​មើល​ឃើញ​ថា​បញ្ហា​ដីធ្លី​ជា​បញ្ហា​ប្រឈម​ធ្ងន់ធ្ងរ​សម្រាប់​ប្រជាពលរដ្ឋ​រងគ្រោះ​នោះ​សមាជិក​គណៈកម្មការ​ទី​១​នៃ​រដ្ឋសភា​ផ្នែក​​សិទ្ធិមនុស្ស​ទទួល​ពាក្យ​បណ្តឹង​អង្កេត​លោក ងឹម ញេង ដែល​​បាន​ចូលរួម​សិក្ខា​សាលា​​​​នេះ​បាន​​​អំពាវនាវ​ដល់​​អាជ្ញាធរ​ឲ្យ​បញ្ឈប់​ការ​គំរាម​កំហែង​ និង​រំលោភបំពាន​​ទៅលើ​សិទ្ធិ​​របស់​​ប្រជាពលរដ្ឋ​ដែល​​ជា​ម្ចាស់​ទឹក​ម្ចាស់​ដី​ទាំង​នោះ។

លោក​​​ថា៖ «សូម​ចូលរួម​ដោះស្រាយ​​ទាំង​អស់​គ្នា​ដើម្បី​ឲ្យ​មាន​សុខ​សន្តិភាព​ក្នុង​​សង្គម​​​ទាំង​​មូល​កុំ​ឲ្យ​ទៅ​កន្លែង​ណា​ឃើញ​តែ​ទឹកភ្នែក​រាស្ត្រ»។

ជា​ការ​ឆ្លើយតប​តំណាង​មន្ត្រី​​​​ក្រសួង​រៀបចំ​ដែនដី​នគរូបនីយកម្ម និង​សំណង់​លោក អេ ប៊ុនធឿន បាន​​ថ្លែង​ថា​ក្រសួង​​កំពុង​យក​ចិត្ត​ទុកដាក់​ក្នុង​ការ​​ដោះស្រាយ​ទំនាស់​ដីធ្លី​ដែល​កំពុង​កើត​មាន​​ដោយ​​​បង្កើត​ជា​គោល​នយោបាយ និង​សកម្មភាព​ការងារ​ជា​បន្តបន្ទាប់​ជាពិសេស​គឺ​ការ​​ចុះ​បញ្ជី​ដីធ្លី​តាម​បទបញ្ជា​ ០១ ​របស់​រាជរដ្ឋាភិបាល​ដើម្បី​បញ្ចប់​ជម្លោះ​។

លោក​ថា៖ «តាមរយៈ​ការ​អនុវត្ត​គោលការណ៍​ទាំងនេះ​ក្រសួង​បាន​សម្រេច​ផ្តល់​ប័ណ្ណ​កម្មសិទ្ធិ​ជូន​ប្រជាពលរដ្ឋ​លើ​ផ្ទៃ​ដី​ជាង ២ ​លាន​ហិកតា​។ ក្រោម​ការ​ចង្អុល​ទិស​ពី​រាជរដ្ឋាភិបាល​គឺ​យើង​បាន​ចុះ​បញ្ជី​ផ្តល់​ប័ណ្ណ​​ជូន​ពលរដ្ឋ​ផង​ដោះ​បញ្ហា​​ទំនាស់​​ដីធ្លី​នៅ​តំបន់​នោះ​ផង​»៕

You might also like More from author

Comments are closed.