ក្រុម ​ហែកឃើរ​ ចាប់ផ្តើម​ហែក​គេហទំព័រ​ក្នុង​ស្រុក​ជាច្រើន

0
Cambodia Website Design
រូប​មួយ​នៅ​លើ​ទំព័រ​ហ្វេសប៊ុក​របស់​ក្រុម​ហែកឃើរ​។ រូបថត ហ្វេសប៊ុក
រូប​មួយ​នៅ​លើ​ទំព័រ​ហ្វេសប៊ុក​របស់​ក្រុម​ហែកឃើរ​។ រូបថត ហ្វេសប៊ុក

ភ្នំពេញៈ ក្រុម​ហែកឃើរ​ដែល​ហៅ​ខ្លួន​ឯង​ថា CyberTeamRox បាន​ហែក​ចូល​​គេហទំព័រ​​ក្នុង​ស្រុក​ជាច្រើន​ក្នុង​រយៈពេល​ពីរ​ថ្ងៃ​កន្លង​មក​ក្នុង​នោះ​មាន​គេហទំព័រ​របស់​កងទ័ព​ជើង​​ទឹក​​កម្ពុជា​គ្រឹះស្ថាន​មីក្រូហិរញ្ញវត្ថុ​អ៊ីអន និង​​សាកល​វិទ្យាល័យ​បៀលប្រាយ​។

ការ​ហែក​នេះ​ហាក់​ដូចជា​ការ​​ជ្រើសរើស​គោលដៅ​​​គ្មាន​គ្រោង​ទុក​ចាប់​តាំងពី​​ថ្ងៃ​អាទិត្យ​ក្រុម​ហែកឃើរ​ដែល​ប្រើ​ឈ្មោះ​​ក្លែងក្លាយ ​Harith101 នេះ​បាន​បង្អាក់​ដំណើរការ​របស់​គេហទំព័រ​រាប់​សិប​ទំព័រ។ ក្នុង​​ករណី​​ខ្លះ​អ្នក​ចូល​មើល​ត្រូវ​បាន​​ស្វាគមន៍​​ដោយសារ «Hacked by Hanrith 101​» ហើយ​ពួកគេ​​មិន​អាច​​ចូល​ទៅក្នុង​គេហទំព័រ​បាន​ទេ​។

Cambodia Website Design

លោក ឈុំ សុជាតិ អ្នក​នាំ​ពាក្យ​ក្រសួង​ការពារ​ជាតិ​បាន​បញ្ជាក់​កាលពី​ម្សិលមិញ​ថា​ពួក​ហែកឃឺ​អាច​ពិនិត្យ​ទិន្នន័យ​លើ​គេហទំព័រ​របស់​កងទ័ព​ជើង​ទឹក​ប៉ុន្តែ​ទិន្នន័យ​នោះ​ពុំមែន​ជា​ព័ត៌មាន​រសើប​ទេ។

លោក​បន្ត​ថា៖ «ឥឡូវ​នេះ​ក្រុម​បច្ចេកទេស​បាន​ជួប​ប្រជុំ​ដើម្បី​តាមដាន​បញ្ហា​ទាំង​នេះ។ យើង​កំពុង​តែ​ស្វែងរក​ជន​សង្ស័យ»។

ទំព័រ​ហ្វេសប៊ុក​របស់ Cyber Team Rox បាន​លើក​ឡើង​ពី​ការ​ហែក​លើ​គេហទំព័រ​របស់​ក្រសួង​ទេសចរណ៍ និង​ក្រសួង​សង្គម​កិច្ច។ ពេល​ទាក់ទង​កាលពី​ម្សិលមិញ​ក្រសួង​ទាំង​ពីរ​បាន​រាយការណ៍​ពី​សកម្មភាព​ហែក។

ទំព័រ​ហ្វេសប៊ុក​របស់​ក្រុម​ហែកឃើរ​ពុំ​បាន​បង្ហាញ​នូវ​គោលបំណង​ដែល​ពួកគេ​ហែក​ទេ​ប៉ុន្តែ​កាលពី​ម្សិលមិញ​ពួកគេ​បាន​បង្ហោះ​ឡើង​វិញ​នូវ​វីដេអូ​ដែល​បាន​ផ្សាយ​ដោយ​បណ្តាញ​ហែកឃើរ​ពិភពលោក Anonymous កាលពី​ខែ​កញ្ញា ឆ្នាំ ២០១៣។ វីដេអូ​នេះ​ត្រូវ​បាន​បង្ហោះ​ក្នុង​គ្រា​មាន​មហាបាតុកម្ម​ប្រឆាំង​នឹង​លទ្ធផល​នៃ​ការ​បោះឆ្នោត​កាលពី​ខែ​សីហា​ឆ្នាំ ២០១៣។

វីដេអូ​នេះ​បាន​ព្រមាន​រដ្ឋាភិបាល​កម្ពុជា​ដែល​ថា​រដ្ឋាភិបាល​បាន​ធ្វើ​ជា​សត្រូវ​របស់ Anonymous បន្ទាប់ពី​រដ្ឋាភិបាល​មិន​គិត​ពី​ការ​ស្នើសុំ​របស់​ប្រជាជន។ នៅ​ពេល​នោះ​សាខា​ក្នុង​ស្រុក​របស់ Anonymous កម្ពុជា​បាន​ចាប់​ផ្តើម​យុទ្ធនាការ​ហែក​ចូល​គេហទំព័រ​របស់​រដ្ឋាភិបាល​ជាង ៣០ និង​ក្រុមហ៊ុន​ឯកជន​មួយ​ចំនួន។

សមាជិក​ពីរ​នាក់​នៃ​ក្រុម​ហែកឃឺ​សាខា​ក្នុង​ស្រុក​នេះ​ត្រូវ​បាន​សមត្ថកិច្ច​ចាប់​ខ្លួន​នៅ​ក្នុង​ខែ​មេសា ឆ្នាំ ២០១៤ ប៉ុន្តែ​ត្រូវ​បាន​តុលាការ​កាត់​បន្ថយ​ទោស​បន្ទាប់ពី​បាន​យល់​ព្រម​ធ្វើការ​ប្រយុទ្ធ​ប្រឆាំង​នឹង​ឧក្រិដ្ឋកម្ម​លើ​អ៊ីនធឺណិត​ដោយ​បម្រើ​ការងារ​នៅ​ក្នុង​ក្រសួង​មហាផ្ទៃ។

គេហទំព័រ​របស់​សមាគម​សិប្បករ​កម្ពុជា​ដែល​បាន​ផ្ដល់​ព័ត៌មាន​លើ​អ៊ីនធឺណិត​ដល់​សហគ្រាស​សង្គម​ចំនួន ៥០ ក៏​បាន​ក្លាយ​ជា​គោលដៅ​នៃ​ការ​ហែក​របស់ CyberTeamRox ផង​ដែរ។ លោក ម៉ែន ស៊ីនួន នាយក​របស់​គេហទំព័រ​របស់​សមាគម​សិប្បករ​កម្ពុជា​បាន​ថ្លែង​ថា៖ «ខ្ញុំ​មិន​ដឹង​ថា​តើ​ហេតុ​អ្វី​ពួកគេ​ធ្វើ​បែប​នេះ​ទេ»។

ទោះ​ជា​យ៉ាងណា​ក៏​ដោយ​គេហទំព័រ​ភាគច្រើន​ដែល​ត្រូវ​បាន​ហែក​បាន​ដំណើរការ​ជា​ធម្មតា​វិញ​ហើយ៕ TK

You might also like More from author

Comments are closed.