ម្ចាស់​​ពាន The Voice Cambodia 2 ​នេះ មាន​ប្រវត្តិ​តស៊ូ​ខ្លាំង!

0

សំឡេងហ៊ោកញ្ជ្រៀវពេញ Studio The Voice Cambodia អបអរសាទរទៅជាម្ចាស់ពាន The Voice Cambodia រដូវកាលទី២ ដោយឈ្នះលើបេក្ខជន៣រូបទៀតអម្បាញ់មិញនេះ។

ជាមួយជយលាភីនេះ យុវជនមកពីខេត្តព្រះវិហាររូបនេះ ទទួលបានទឹកប្រាក់ចំនួន ១០០លានរៀលពីកម្មវិធី ១០០០ដុល្លារពីអគ្គនាយកក្រុមហ៊ុនហង្សមាស ២០០០ដុល្លារពីម្ចាស់ឧបត្ថម្ភកម្មវិធី និងក្លាយជាតារាចម្រៀងចុះកុងត្រាជាមួយផលិតកម្មរស្មីហង្សមាស រួមទាំងក្លាយជាសមាជិករបស់កម្មវិធី The Voice ពិភពលោកថែមទៀតផង។

យ៉ាងណាមិញមុនបានក្លាយជាម្ចាស់ពាន The Voice Cambodia ថែល ថៃ ជួបរឿងរ៉ាវបែបណាខ្លះនៅក្នុងជីវិត តោះតាមដានជីវប្រវត្តិលោកជាមួយ Sabay ខាងក្រោម៖

ជីវិតកុមារភាព និងកាលនៅស្រុកកំណើត

ថែល ថៃ មានស្រុកកំណើតមកពីខេត្តកំពង់ចាម ប៉ុន្តែអំឡុងឆ្នាំ ២០០៣ លោក និងក្រុមគ្រួសារបានផ្លាស់ប្ដូរទីលំនៅទៅនៅខេត្តព្រះវិហារវិញ ដែលកាលនោះ លោករៀនថ្នាក់ទី៨។ ដោយសារតែជីវភាពខ្វះខាត ថែល ថៃ បញ្ចប់ត្រឹមសញ្ញាប័ត្រមធ្យមសិក្សាទុតិយភូមិប៉ុណ្ណោះ នៅវិទ្យាល័យជាស៊ីមត្បែងមានជ័យ ខេត្តព្រះវិហារ។

លោកឪពុកឈ្មោះ សេន ឋែល មានរបរជានាយទាហាននៅការពារប្រាសាទព្រះវិហារ ចំណែកអ្នកម្ដាយឈ្មោះ ញឹម លេង មុខរបរអ្នកលក់បាយនៅជើងភ្នំប្រាសាទព្រះវិហារប៉ុន្តែពួកគាត់បានចែកផ្លូវគ្នាហើយ។ ថៃ មានបងប្អូន៣នាក់ ប្រុសទាំង៣ ប៉ុន្តែបងប្រុសម្នាក់បានស្លាប់ដោយសារជំងឺ។

ឆ្នាំ ២០០៨ បញ្ចប់ការសិក្សាត្រឹមថ្នាក់ទី១២ ដោយសារក្រុមគ្រួសារ មិនមានសមត្ថភាពឲ្យ ថែល ថៃ បន្តថ្នាក់បរិញ្ញាបត្រ យុវជននេះក៏សម្រេចចិត្តចូលច្រៀងនៅក្នុងអង្គការទស្សនៈពិភពលោក។ មិនត្រឹមតែច្រៀងប៉ុណ្ណោះទេ លោកក៏បានចូលរួមការងារសង្គមជាមួយនឹងអង្គការនេះផងដែរ។

ថែល ថៃ ថ្លែង៖ “កាលនោះជីវភាពខ្វះមុខខ្វះក្រោយ អត់មានសមត្ថភាពគ្រប់គ្រាន់ ដើម្បីបន្តថ្នាក់បរិញ្ញាបត្រទៀតទេ ដូច្នេះខ្ញុំបានសម្រេចចិត្តចូលច្រៀងក្នុងអង្គការទស្សនៈពិភពលោក”។

ជីវិតលើដីរាជធានី

ការងារជាអ្នកចម្រៀងនៅក្នុងអង្គការទស្សនៈពិភពលោក អាចឲ្យ ថែល ថៃ មានចំណូលបានត្រឹមតែចម្អែតក្រពះ មិនមានអ្វីលើសនោះឡើយ។ យុវជនមកពីព្រះវិហារបន្តឲ្យដឹងទៀតថា លុះមកដល់ឆ្នាំ២០១០ ដោយសារការមើលឃើញ និងដឹងពីសមត្ថភាពរបស់លោក មានមិត្តភក្តិម្នាក់បានជំរុញគេ ឲ្យដាក់ពាក្យប្រឡងក្នុងកម្មវិធីមួយគឺ “ពេជ្រកំពុងច្នៃ” របស់ស្ថានីយទូរទស្សន៍អាស៊ីអាគ្នេយ៍ ពេលនោះរូបគេទទួលបានចំណាត់ថ្នាក់លេខ២។

យុវជនមកពីខេត្តព្រះវិហារលើកឡើង៖ បាទបង…ច្រៀងនៅខេត្ត ក៏មិនបានសល់អីជាដុំកំភួនឡើយ។ មានពេលមួយនោះ មិត្តភក្តិខ្ញុំម្នាក់ គេថាខ្ញុំច្រៀងពីរោះអីចឹង ម៉េចមិនដាក់ពាក្យប្រឡងនៅភ្នំពេញ ដែលកាលនោះមានកម្មវីធីមួយគឺ ពេជ្រកំពុងច្នៃ ហើយខ្ញុំក៏បានធ្វើតាមការណែនាំរបស់មិត្តឡើងមកដាក់ពាក្យប្រឡងទៅបង”។

បន្ទាប់ពីបានជាប់ជយលាភីលេខ៣រួចមករូបគេ បានបន្តកុងត្រាការងារជាមួយកម្មវិធីរយៈពេល៣ឆ្នាំ។ ជាមួយគ្នានេះ រយៈពេល៣ឆ្នាំហាក់មិនមានអ្វីរីកចម្រើនសម្រាប់ជីវភាពគេឡើយ។ លុះមកដល់ឆ្នាំ ២០១៣ ថែល ថៃ បានដាក់ពាក្យក្នុងកម្មវិធីមួយថ្មីទៀតរបស់ស្ថានីយទូរទស្សន៍អប្សរា គឺកម្មវិធី “The Best Star” គ្រានោះរូបគេទទួលបានពានប្រជាប្រិយ។

ក្រោយប្រឡងចប់កម្មវិធី “The Best Star” ថែល ថៃ ជាប់កុងត្រារយៈពេល៣ឆ្នាំជាមួយនឹងកម្មវិធី ដោយលោកបានធ្វើការជាមួយតារាសម្ដែងលោក ម៉េង ប៊ុនឡូ ក្នុងតួនាទីជាជំនួយការផ្នែកកាន់ Studio ថតចម្រៀង ។ ជីវិតម្នាក់ឯងតែលតោលលើទឹកដីសម្បូរទៅដោយភ្លើងពណ៌នេះ ថែល ថៃ ប្រាប់ថា ពិតជាលំបាក ខ្វះមុខខ្វះក្រោយ មិនមានអ្វីសេសសល់ក្នុងខ្លួនឡើយ។

ទោះបីជាជាប់កុងត្រាជាមួយកម្មវិធី The Best Star ក៏ពិតមែន ប៉ុន្តែខាងក្រុមហ៊ុន មិនបានហាមឃាត់រូបគេមិនឲ្យចេញដើរច្រៀងខាង ក្រៅឡើយ។ ថៃ សម្រេចចិត្តចូលច្រៀងក្នុងហាង Moon Light ដើម្បីបានថវិកាគ្រាន់ជួយជំនួសដៃជើងអ្នកម្ដាយមេម៉ាយឯស្រុកកំណើត។ ពេលនោះ រូបគេបានរើចេញពីផ្ទះជួលមួយកន្លែងម្តុំអាស៊ីអាគ្នេយ៍ មកនៅជាមួយ ម៉េង ប៊ុនឡូ រយៈពេល៣ឆ្នាំ បន្ទាប់មករើទៅនៅជាមួយអ៊ុំស្រីវិញ។

មូលហេតុដាក់ពាក្យប្រឡង The Voice Cambodia

មិនបានយូរប៉ុន្មាន លុះមកដល់ឆ្នាំ ២០១៥ កម្មវិធី The Voice Cambodia រដូវកាលទី២ បានចាប់ផ្ដើម លោកក៏បានដាក់ពាក្យ តាមរយៈការជំរុញទឹកចិត្តពីម្ដាយ បងប្អូន មិត្តភក្តិ និងម្ចាស់ហាងថា លោកមានសមត្ថភាពច្រៀងពីរោះអីចឹង ហេតុអ្វីមិនដាក់ពាក្យប្រឡងកម្មវិធី លំដាប់ថ្នាក់ពិភពលោក? ។

គួបផ្សំការជំរុញទឹកចិត្តពីមជ្ឈដ្ឋានជុំវិញខ្លួនដូចនេះ ថែល ថៃ កាន់តែមានទំនុកចិត្តរួមផ្សំនឹងការស្រលាញ់ទៀតនោះ លោកមិនរុញរានឹងដាក់ពាក្យប្រឡងឡើយ រហូតឈ្នះពានទាំងមិននឹកស្មាន ប៉ុន្មាននាទីមុននេះ។ ថែល ថៃ ប្រាប់ទៀតថា បន្ទាប់ពីសម្រេចចិត្តដាក់ពាក្យប្រឡង លោកបានតាំងចិត្តថា យ៉ាងហោចណាស់បានជាប់ត្រឹម៨នាក់ ចុងក្រោយ ឬវគ្គពាក់កណ្ដាលផ្តាច់ព្រ័ត្រ គឺអស់ចិត្តហើយ ប៉ុន្តែអ្វីដែលគួរឲ្យភ្ញាក់ផ្អើលនោះ ថែល ថៃ បានជាប់ ៤នាក់ចុងក្រោយ និងបានក្លាយជាម្ចាស់ពាន The Voice Cambodia រដូវកាលទី២ ថែមទៀតផង។

ថ្លែងទាំងក្ដីរំភើប ថែល ថៃ ប្រាប់ថា រាល់ភាពជោគជ័យទាំងនេះ ក៏ដោយសារអ្នកនៅក្បែរខ្លួន បងប្អូន ក្រុមគ្រួសារ ជាពិសេសអ្នកដែលបានគាំទ្រ និងជួយបោះឆ្នោតឲ្យលោកបានជាប់ពាន The Voice នេះទៀតផង។ ម្ចាស់ពានថ្លែងទាំងមុតមាំថា រូបគេនឹងព្យាយាមអភិវឌ្ឍខ្លួនឯងបន្ថែមទៀត ដើម្បីបម្រើតាមសេចក្ដីត្រូវការរបស់បងប្អូនតទៅមុខទៀត៕

ប្រភព៖http://news.sabay.com.kh/article/742737

You might also like More from author

Leave A Reply

Your email address will not be published.