លោក ធន សារាយ ​មិន​ចូល​តាម​ការ​កោះ​ព្រោះ​កំពុង​ធ្វើ​ទស្សនៈកិច្ច​នៅ​ក្រៅ​ប្រទេស

5
Cambodia Website Design

ភ្នំពេញ: លោក ធន សារាយ កាលពីម្សិលមិញមិនបានចូលបំភ្លឺនៅតុលាការតាមការកោះហៅរបស់ចៅក្រមស៊ើបសួរទេ ដោយសារជាប់បេសកកម្មទៅក្រៅប្រទេស។

អ្នកជំនាញផ្នែកច្បាប់ថ្លែងថាចាប់តាំងពីមានការកាត់ទោសលោក កឹម សុខា ពីបទបដិសេធក្នុងការចូលខ្លួនមកតាមការកោះហៅសាក្សីមានភាពច្បាស់លាស់ខណៈសង្គមស៊ីវិលថ្លែងថាអង្គការការពារសិទ្ធិមនុស្សកំពុងទទួលរងការគំរាមកំហែងកាន់តែខ្លាំង។

លោក ធន សារាយ ប្រធានសមាគមអាដហុកត្រូវបានលោក ធាម ច័ន្ទពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញកោះហៅឲ្យចូលបំភ្លឺនៅព្រឹកថ្ងៃទី ២៤ តុលា ម្សិលមិញក្នុងឋានៈជាសាក្សីដើម្បីសាកសួរក្នុងដំណើររឿងសូកប៉ាន់សាក្សីដែលសំណុំរឿងនេះបានធ្វើឲ្យបុគ្គលិករបស់លោក ៤ នាក់មន្ត្រី គ.ជ.ប. មន្ត្រីបក្សប្រឆាំងជាប់ពន្ធនាគារ និងមនុស្សមួយចំនួនទៀតត្រូវបានកោះហៅមកសាកសួរ។

Cambodia Website Design

កាលពីម្សិលមិញបុគ្គលិកអង្គការអាដហុកដែលសុំមិនបញ្ចេញឈ្មោះបានឲ្យដឹងថាលោក ធន សារាយ កំពុងស្ថិតនៅប្រទេសកាណាដាក្នុងដំណើរទស្សកិច្ចរយៈពេលវែងមួយដែលរួមមានដំណើរទៅកាន់ទីក្រុងហ្សឺណែវ ប្រទេសកាណាដា អាមេរិក និងអូស្រ្តាលី។ លោកថ្លែងថា៖ «លោកបានចេញតាំងពីមុនពេលដែលតុលាការបានចេញដីកាកោះ។ គាត់ក៏ទៅដោយសារមូលហេតុសុខភាពដែរ»។

លោកស្រី គា សុផល មេធាវីដែលការពារក្តីមន្ត្រីអាដហុកទាំង ៤ នាក់ដែលកំពុងជាប់ពន្ធនាគារបានថ្លែងថាលោកស្រីមិនបានការពារក្តីលោក ធន សារាយ ទេដោយសារតាមផ្លូវច្បាប់លោកស្រីមិនអាចការពារជនសង្ស័យ និងសាក្សីជាមួយគ្នាបានទេ។

ទោះយ៉ាងណាមន្ត្រីសមាគមអាដហុកលោក ប៉ែន ប៊ុណ្ណា បានពន្យល់ថាតាមផ្លូវច្បាប់លោក ធន សារាយ មិនចាំបាច់មានមេធាវីទេដោយសារក្នុងឋានៈជាសាក្សីគាត់ត្រូវឆ្លើយតាមការពិតដែលគាត់បានដឹង។

លោកថ្លែងថា៖ «តាមផ្លូវច្បាប់គាត់ត្រូវតែចូលតាមការកោះហៅ។ គាត់មិនអាចពិភាក្សាជាមួយអ្នកណាទេគឺខុសពីដើមចោទ និងចុងចោទដែលត្រូវមានសិទ្ធិផ្តល់ភ័ស្តុតាងដោះបន្ទុក ឬដោះបន្ទុក។ ដូច្នេះជាក់ស្តែងគាត់មិនចាំបាច់មានមេធាវីទេ»។

លោកមេធាវី សុក សំអឿន ថ្លែងថាករណីរបស់លោក ធន សារាយ មិនអាចឈានដល់ការចាប់ខ្លួនពីបទបដិសេធក្នុងការចូលខ្លួនដូចករណីលោក កឹម សុខា ទេដោយសារគាត់មានមូលហេតុសមរម្យ។

លោកថ្លែងថា៖ «បើយើងនិយាយតាមច្បាប់កុំនិយាយតាមគេចង់ចាប់បើយើងមានមូលហតុច្បាស់លាស់ដូចជាគាត់ទៅព្យាបាលនៅស្រុកក្រៅអីវាអត់មានបញ្ហាអីទេសំខាន់វាសមហេតុសមផលអត់»។

លោកបន្តថា៖ «ច្បាប់ស្រុកយើងវាអត់ច្បាស់។ តាំងពីមានរឿង កឹម សុខា អីមកច្បាប់លែងច្បាស់អស់ហើយ។ មិនដែលមានរឿងសាក្សីអត់មកទេ។ មិនដែលមានរឿងចោទប្រកាន់ដាក់ទោសសាក្សីផងហ្នឹង។ សាក្សីមួយគំនរមានរឿងក្តីមួយគំនរដែលសាក្សីអត់មក»។

លោក អំ សំអាត ប្រធានផ្នែកស៊ើបអង្កេតនៃអង្គការលីកាដូនិយាយថាការកោះហៅនេះគឺជាការគំរាមកំហែង និងជាការរំខានបន្ថែមទៅលើសមាគមសិទ្ធិមនុស្សអាដហុកក៏ដូចជាអង្គការសង្គមស៊ីវិលផ្សេងទៀតដែលធ្វើការផ្នែកសិទ្ធិមនុស្ស។

លោកថ្លែងថា៖ «ពីដើមមកយើងឃើញអាជ្ញាធរគេចាត់ទុកអង្គការការពារសិទ្ធិមនុស្សគឺជាអ្នកប្រឆាំង។ វាមិនមែនជាដៃគូក្នុងការអភិវឌ្ឍវាទៅជាគេចោទប្រកាន់ថាប្រឆាំង»។

លោកបន្តថាបើសិនជាអវត្តមានរបស់លោក ធន សារាយ ធ្វើឲ្យមានការចាប់ខ្លួនស្ថានភាពនឹងកាន់តែធ្ងន់ធ្ងរនៅកម្ពុជា៕

ប្រភព៖  ភ្នំពេញប៉ុស្តិ៏

Comments

comments

You might also like More from author