កាបអុបទិក​ក្រោម​សមុទ្ររបស់ក្រុមហ៊ុន Ezecomនឹង ​​ភ្ជាប់មក​កម្ពុជា ​ដំណើរការ​ឆ្នាំ​ក្រោយ

0 0
Cambodia Website Design

ភ្នំពេញៈ ក្រុមហ៊ុន Ezecom បានប្រកាសកាលពីម្សិលមិញថាខ្សែកាបអុបទិកក្រោមសមុទ្រលើកដំបូងរបស់កម្ពុជាត្រូវបានរំពឹងថានឹងប្រតិបត្តិការនៅត្រីមាសទី ១ ឆ្នាំ ២០១៧ ខណៈការតភ្ជាប់ជិតបញ្ចប់សព្វគ្រប់ហើយ។

ខ្សែកាបក្រោមសមុទ្រ ម៉ាឡេស៊ី កម្ពុជា ថៃ (MCT) នឹងតភា្ជប់ប្រទេសទាំង ៣ ដោយផ្ទាល់ហើយការរៀបចំនៅពេលនេះកំពុងដំណើរការក្នុងការដាក់ខ្សែកាបក្រោមសមុទ្រ។ នៅពេលបញ្ចប់ខ្សែកាបនឹងតភ្ជាប់កម្ពុជាជាមួយច្រកចេញចូលអាស៊ី អាមេរិក (AAG) ប្រវែង ២០ ០០០ គ.ម ដែលអាចតភ្ជាប់ខ្សែកាបអុបទិកជាមួយអាមេរិកតាមរយៈប្រទេសម៉ាឡេស៊ី។ នេះបើតាមលោក Yves Schaeffer អគ្គនាយកក្រុមហ៊ុន Ezecom។

លោកថ្លែងថា៖ «យើងបានចុះហត្ថលេខាស្ដីពីភាពជាដៃគូជាមួយប្រទេសម៉ាឡេស៊ី និងថៃកាលពីខែឧសភាឆ្នាំ ២០១៥ ហើយការសាងសង់ខ្សែកាបនេះត្រូវបានដំណើរការចាប់តាំងពីពេលនោះ និងត្រូវបានរំពឹងថានឹងរួចរាល់នៅត្រីមាសទី ១ ឆ្នាំ ២០១៧»។

Cambodia Website Design

លោកបញ្ជាក់ថា៖ «ស្ថានីយដាក់ខ្សែកាបនៅក្នុងប្រទេសទាំង ៣ ត្រៀមរួចជាស្រេចដើម្បីទទួលខ្សែកាបនេះ»។

លោកបញ្ជាក់ថាខ្សែកាបក្រោមសមុទ្រ និងហេដ្ឋារចនាសម្ព័ន្ធទាក់ទងនឹងត្រូវបានបញ្ចប់ក្នុងតម្លៃ ៧០ លានដុល្លារតាមរយៈក្រុមហ៊ុនបុត្រសម្ព័ន្ធ Telcotech របស់ក្រុមហ៊ុន Ezecom។

អគ្គនាយក Ezecom បានពន្យល់ថាល្បឿនអ៊ីនធឺណិតពិតប្រាកដសម្រាប់អ្នកប្រើប្រាស់ចុងក្រោយនឹងពឹងលើបច្ចេកវិទ្យាដែលពួកគេប្រើប្រាស់។ លោកបន្ថែមថា៖ «និយាយពីល្បឿនគឺពិបាកបន្តិចសម្រាប់ពួកយើងដោយសារតែយើងកំពុងផ្ដល់សមត្ថភាពខ្សែកាប ICT យើងមិនមែនកំពុងផ្ដល់ល្បឿនដូចនោះទេដូច្នេះវានឹងពឹងលើហេដ្ឋារចនាសម្ព័ន្ធអ្នកដែលយើងនឹងលក់ទៅឲ្យ»។

ខ្សែកាប MTC នឹងតភ្ជាប់ទីក្រុងនៃខេត្ត Rayong របស់ប្រទេសថៃទីក្រុង Cherating នៅក្នុងប្រទេសម៉ាឡេស៊ី និងក្រុងព្រះសីហនុរបស់ប្រទេសកម្ពុជា។ ប្រតិបត្តិករបរទេសនឹងអាចផ្ដល់សេវាអ៊ីនធឺណិតនៅក្នុងប្រទេសកម្ពុជាផងដែរ។ នេះបើតាមលោក Schaeffer។

លោក Prakash Velaydudhan ប្រធានបច្ចេកទេសនៅក្រុមហ៊ុន Ezecom បានប្រាប់ភ្នំពេញប៉ុស្ដិ៍ថាសមត្ថភាពថ្មីដែលបានផ្ដល់ដោយខ្សែកាបនេះអាចលឿនជាងពី ២០ ដល់ ៣០ ដងធៀបនឹងអ្វីដែលមាននៅពេលបច្ចុប្បន្ននៅក្នុងប្រទេសកម្ពុជា។

លោក ឃិន ម៉ារិទ្ធិ នាយកប្រចាំប្រទេសទទួលបន្ទុកទូរគមនាគមន៍របស់ក្រុមហ៊ុន NTT បានបញ្ជាក់ថាប្រសិនបើក្រុមហ៊ុន Ezecom បញ្ចប់ការតភ្ជាប់កម្ពុជានឹងខ្សែកាប MTC តាមកាលបរិច្ឆេទដែលបានប្រកាសនេះវានឹងជាកិច្ចខិតខំប្រឹងប្រែងលើកដំបូងនៅក្នុងប្រទេសកម្ពុជា។ NTT ដែលជាក្រុមហ៊ុនផ្ដល់បច្ចេកវិទ្យាជប៉ុនកំពុងបន្តការងារបញ្ចប់ខ្សែកាបក្រោមសមុទ្រលើកទីពីរដែលតភ្ជាប់កម្ពុជាទៅខ្សែកាប Asia Submarine-Cable Express (ASE) ជាខ្សែកាបមានប្រវែង ៧ ៨០០ គីឡូម៉ែត្រតភ្ជាប់រវាងប្រទេសជប៉ុន និងហ្វីលីពីន។

បណ្ដាញខ្សែកាបអុបទិកកម្ពុជា (CFOCN) កំពុងអភិវឌ្ឍការតភ្ជាប់ខ្សែកាបអុបទិកលើកទី ៣ សម្រាប់កម្ពុជាតាមរយៈខ្សែកាប Asia-Africa-Europe-1 (AAE-1)។

លោក Steven Path ប្រធានសហព័ន្ធ ICT កម្ពុជាបានកត់សម្គាល់ថាអត្ថប្រយោជន៍នៃការបន្ថែមការតភ្ជាប់ខ្សែកាបអុបទិកសម្រាប់កម្ពុជាពាក់ព័ន្ធជាសំខាន់លើតម្លៃសមរម្យ និងសេវាអ៊ីនធឺណិតដែលមានគុណភាពកាន់តែប្រសើរ។

លោកលើកឡើងថា៖ «ឥទ្ធិពលនៃការតភ្ជាប់នេះគួរតែមានសារៈសំខាន់ដោយសារតែវាបង្កើតលទ្ធភាពទទួលបានកាន់តែច្រើន និងផ្លូវកាន់តែច្រើនចំពោះអ៊ីនធឺណិតដូច្នេះតម្លៃគួរតែធ្លាក់ចុះ»។ លោកបានបន្តថា៖ «យើងពឹងផ្អែកខ្លាំងលើប្រភពមួយ ឬពីរសម្រាប់អ៊ីនធឺណិតរបស់យើងប៉ុន្តែនៅពេលនេះខ្សែកាបនេះនឹងផ្ដល់ដល់ពួកយើងនូវផ្លូវមួយកាន់តែធំហើយតម្លៃកាន់តែល្អ»៕

02b8488download

ប្រភព៖ ភ្នំពេញប៉ុស្តិ៏

You might also like More from author

Leave A Reply

Your email address will not be published.