ប្រជាពលរដ្ឋ​ប្រមាណ ៣០ នាក់​បាន​ប្រមូល​គ្នា​សុំ​អន្តរាគមន៍​ពី​មន្ត្រី​កងរាជ​អាវុធហត្ថ​

10
Cambodia Website Design
Want create site? Find Free WordPress Themes and plugins.

ក្រចេះ: ប្រជាពលរដ្ឋប្រមាណ ៣០ នាក់បានប្រមូលគ្នាសុំអន្តរាគមន៍ពីមន្ត្រីកងរាជអាវុធហត្ថនៅក្នុងស្រុកចិត្របុរី ខេត្តក្រចេះដើម្បីសុំអង្វរករឲ្យមានការដោះលែងគោយន្តចំនួន ៦ គ្រឿង និងអ្នកបើកបរក្រោយពីមានការឃាត់ខ្លួនដែលត្រូវបានចោទប្រកាន់អំពីការដឹកជញ្ជូនឈើពីក្នុងព្រៃដោយឥតច្បាប់។

លោក ឈូ ឆូយ មេឃុំគោលាប់ ស្រុកចិត្របុរី ប្រាប់ភ្នំពេញប៉ុស្តិ៍តាមទូរស័ព្ទកាលពីម្សិលមិញថាអ្នកបើកគោយន្ត និងគោយន្តត្រូវបានដោះលែងភ្លាមដែរក្រោយពីមានការស្នើសុំ និងការពន្យល់ពីប្រជាពលរដ្ឋ និងទម្លាក់ឈើទុកនៅកន្លែងកងរាជអាវុធហត្ថ។

លោកមេឃុំថ្លែងថា៖ «ក្រោយពីដឹងថាមានសមត្ថកិច្ចឃាត់គោយន្តដឹកឈើនោះប្រជាពលរដ្ឋប្រហែល ៣០ នាក់បានទៅជួយនិយាយជាមួយកងរាជអាវុធហត្ថដើម្បីឲ្យដោះលែងម្ចាស់គោយន្តដោយថាមិនមានអំពើហិង្សា ឬការឈ្លោះប្រកែកអ្វីកើតឡើងនោះទេទោះយ៉ាងណាក្រោយពីប្រជាពលរដ្ឋព្រមទម្លាក់ឈើទាំងនោះនៅកន្លែងមន្ត្រីអាវុធហត្ថពួកគាត់ក៏បានបរគោយន្តរបស់គាត់មកផ្ទះវិញដោយមិនមានការហាមឃាត់អ្វីពីមន្ត្រីកងរាជអាវុធហត្ថនោះដែរ»។

លោកថា ឈើទាំងនោះមិនមែនជាប្រភេទឈើប្រណីតទេដោយថាប្រជាពលរដ្ឋគ្រាន់តែចូលក្នុងព្រៃដើម្បីប្រមូលចម្រៀកឈើទាំងនោះពីក្នុងព្រៃដោយទៅម្តងៗអាចមានរយៈពេលកន្លះខែហើយអាចយកមកលក់បានប្រហែល ២០ ម៉ឺនរៀលក្នុងមួយជើងដោយថាឈើ ១ ដុំអាចលក់ក្នុងតម្លៃ ១០ ០០០ រៀលទៅ ១៥ ០០០ រៀល។

លោកអះអាងថាពួកគាត់ដឹកឈើដែលគាត់រើសតាមភក់ តាមព្រៃក្នុងចម្ការគេ ឈើខ្លះស្អុយ មិនមែនឈើប្រណីតឯណាឈើនេះវាអត់ប្រណីតទេវាជាឈើគាត់ប្រមូលតាមព្រៃតាមផ្សៃ គាត់អត់មានរករឿងជេរគេជេរឯងទេគាត់រំដោះយកតែគោយន្តគាត់ទេ បានគោយន្តហើយគាត់ក៏មកភូមិវិញមក។

នាយប៉ុស្តិ៍រដ្ឋបាលឃុំគោលាប់ លោក ហឿន ពិសិដ្ឋ ឲ្យដឹងដែរថាប្រជាពលរដ្ឋបានទម្លាក់ឈើទុកនៅកន្លែងកងរាជអាវុធហត្ថដោយសន្តិវិធី គ្មានអំពើហិង្សា ឬការឈ្លោះប្រកែកគ្នាកើតឡើងទេ។

លោកបន្ថែមថា៖ «អត់មានប្រកែកគ្នាអីទេកងរាជអាវុធហត្ថក៏គាត់អត់បានរារាំង (យកគោយន្ត) ហើយក៏គ្មានការប្រឆាំងគ្នាឲ្យមានជាហិង្សាអ្វីដែរ»។

មេបញ្ជាការកងរាជអាវុធហត្ថស្រុកចិត្របុរី លោក អ៊ឹម ចិត្រា មានប្រសាសន៍ថាកម្លាំងកងរាជអាវុធហត្ថគ្រាន់តែអនុវត្តតាមចំណាត់ការរបស់មេព្រៃប៉ុណ្ណោះ។

លោកបន្ថែមថា៖ «ឈើហ្នឹងមិនជាការរំដោះអ្វីទេជាការសម្របសម្រួល…អាហ្នឹងជាជំនាញរបស់មេព្រៃ…ជាចំណាត់ការជំនាញរបស់គេខ្ញុំមានសិទ្ធិត្រឹមតែការពារទេ កុំឲ្យតែប្រជាពលរដ្ឋមានបញ្ហាយើងជាកងកម្លាំងហើយពលរដ្ឋទៅវិញខ្ញុំអាជ្ញាធរប្រជាពលរដ្ឋស្តាប់ខ្ញុំណាស់»។

នាយសង្កាត់រដ្ឋបាលព្រៃឈើថ្មគ្រែក្នុងស្រុកចិត្របុរីក្នុងខេត្តក្រចេះលោក ម៉ី វុទ្ធី មិនអាចទាក់ទងបានតាមទូរស័ព្ទទេកាលពីម្សិលមិញ៕

ប្រភព៖ ភ្នំពេញប៉ុស្តិ៏

Did you find apk for android? You can find new Free Android Games and apps.

Comments

comments

You might also like More from author

ចែករំលែក