Ultimate magazine theme for WordPress.

- Advertisement -

ប្រាសាទព្រះគោ ក្នុងស្រុកថាឡាបរិវ៉ាត់

0 21

ប្រាសាទ​ព្រះ​គោ​បុរាណដ្ឋាន​ដ៏​ចំណាស់​កសាង​នៅ​សម័យ​ចេនឡា​ក្នុងស្រុក​ថាឡាបរិវ៉ាត់​

ស្ទឹងត្រែង​គឺជា​ខេត្ដ​មួយ​ដែល​ស្ថិត​នៅ​តាម​ជួរ​ភ្នំ​ភាគ​ឦសាន​នៃ​ប្រទេស​កម្ពុជា​សម្បូរ​ទៅ​ដោយ​សម្បត្ដិ​ធនធានធម្មជាតិ​ព្រៃ​ព្រឹក្សា​តូច​ ធំ​ សត្វព្រៃ​ ជ្រោះ​ជ្រលង​ដងអូរ​ ប្រាង្គ​ប្រាសាទ បុរាណ​ និង​រមណីយដ្ឋាន ។​ ចំណែក​រមណីយដ្ឋាន​ថាឡាបរិវ៉ាត់​ស្ថិត​ក្នុងស្រុក​ថាឡាបរិវ៉ាត់​ មាន​ប្រាង្គ​ប្រាសាទ​ជា​ច្រើន​បាន​រង​នូវ​ការ​បំផ្លាញ​ស្ទើរ​អស់​ គឺ​សល់​តែ​ប្រាសាទ​ព្រះគោ​មួយ​ដែល​ខ្ទេច​ខ្ទាំ​ផ្នែក​ដំបូល​អស់​ ប៉ុន្ដែ​អ្នកស្រុក​ និង​ភ្ញៀវ​ទេសចរ​ជិត​ឆ្ងាយ​នៅ​តែ​នាំ​គ្នា​ទៅ​កំសាន្ដ​ និង​ធ្វើការ​គោរព​បូជា​ចំពោះ​រូប​សំណា​ក​ព្រះ​គោ​យ៉ាងច្រើន​កុះករ ។​

ខេត្ដ​ស្ទឹងត្រែង​មាន​ព្រំប្រទល់​ខាងកើត​ជាប់​នឹង​ខេត្ដរតនគិរី​ ខាងលិច​ជាប់​នឹង​ខេត្ដ​កំពង់ធំ​ ខាងជើង​ជាប់​នឹង​ខេត្ដព្រះវិហារ​ និង​ខាងត្បូង​ជាប់​នឹង​ខេត្ដក្រចេះ ។​ ខេត្ដ​នេះ​ជា​តំបន់​មួយ​ដែល​មាន​សម្រស់​ធម្មជាតិ​យ៉ាង​ល្អ​ត្រកាល​ក្នុង​ការ​ទាក់ទាញ​ភ្ញៀវ​ទេសចរ​ ព្រមទាំង​មាន​សម្បត្ដិ​មរតក​វប្បធម៌​យ៉ាងច្រើន​សន្ធឹកសន្ធាប់​ទៀត​ផង ។​ ចំណែក​រមណីយដ្ឋាន​ថាឡាបរិវ៉ាត់​ ចម្ងាយ​៤​គីឡូម៉ែត្រ​ ពី​ទីរួមខេត្ដ​ បែរមុខ​ទៅ​ទិស​ខាងកើត​មាន​ទំហំ​ប្រមាណ​៥០​ម៉ែត្រការ៉េ ។​ បុរាណ​ដ្ឋាន​ដ៏​ចំណាស់​នេះ​ត្រូវ​បាន​កសាង​ឡើង​ក្នុង​រជ្ជកាល​ព្រះបាទ​ជ័យវរ្ម័ន​ទី​១ (គ.ស​៦៥៧-៦៨១) ​នា​សម័យ​ចេនឡា​ ដោយ​មាន​ការ​កសាង​ប្រាសាទ​ជា​ច្រើន​សម្រាប់​គោរព​បូជា​ ប៉ុន្ដែ​ត្រូវ​រង​នូវ​ការ​បំផ្លិចបំផ្លាញ​ខ្ទេច​អស់ ។​

នៅ​បរិវេណ​នោះ​គេ​សង្កេត​ឃើញ​ប្រាសាទ​ព្រះគោ​ដែល​ពួក​ជន​ទុច្ចរិត​ធ្វើការ​គាស់​កកាយ​ស្វែងរក​វត្ថុ​មាន​តម្លៃ​ក្នុង​អំឡុង​ទសវត្សរ៍​ទី​៨០​ និង​៩០​ ត្រូវ​ខូច​អស់​មួយ​ភាគ​ធំ​ទៅ​ហើយ​ ដែល​កសាង​ពី​ឥដ្ឋក្រហម​មាន​ទំហំ​ប្រមាណ​១០​ម៉ែត្រការ៉េ ។​ ក្រៅពី​សំណង់​ប្រាសាទ​នេះ​ គេ​ឃើញ​មាន​រូបសំណាក​ឥសី​ឈរ​ និង​រូប​ព្រះគោ​កំពុង​ដេក​ ដែល​រង​ការ​បំផ្លាញ​អស់​មួយ​ផ្នែក​នោះ​ត្រូវ​បាន​អ្នកទេសចរ​គ្រប់​វ័យ​នាំ​គ្នា​អុជ​ធូប​បួងសួង​សុំ​សេចក្ដីសុខ​សប្បាយ រកស៊ី​មាន​បាន​ មាន​យសស័ក្ដិ​ថ្កុំថ្កើង​ទៅ​ថ្ងៃ​អនាគត​ ដោយ​ពួក​គេ​ម្នាក់ៗ​បាន​បរិច្ចាក​នូវ​សម្បត្ដិ​និង​នំចំណី​ថែម​ទៀត ។​

- Advertisement -

ទាក់ទិន​ទៅ​នឹង​ប្រាសាទ​រូបសំណាក​ព្រះ​គោ​នេះ​ ចាស់ទុំ​មួយ​ដែល​រស់នៅ​តាម​តំបន់​នោះ​បាន​អះអាង​ថា​ នៅ​សម័យ​បុរាណ​មាន​ជំនឿ​ចំពោះ​បារមី​ព្រះ​គោ​ព្រះ​កែវ​ ដែល​ជា​អ្នក​មាន​បុណ្យ​ចុះ​មក​ចាប់ជាតិ​នៅ​ឋាន​កណ្ដាល​ដើម្បី​ជួយ​ស្រោច​សង់​មនុស្សលោក​ឲ្យ​រួច​ចាក​ផុត​ពី​ទុក្ខទោស​ទាំងពួង ​ធ្វើ​ឲ្យ​ប្រទេស​ជាតិ​មាន​ការ​រីក​ចម្រើន​រុងរឿង ។​ លើស​ពី​នេះ​ទៀត​ ព្រះ​គោ​ជា​យានជំនិះ​របស់​ព្រះ​សិវៈ​ និង​ជា​សត្វពាហនៈ​ដែល​ជួយ​រំលែក​ទុក្ខ​លំបាក​របស់​ប្រជា​កសិករ​បាន​យ៉ាងច្រើន​នេះ​ហើយ​ដើម្បី​ជា​ការ​ដឹងគុណ​ទើប​គេ​កសាង​រូប​ព្រះ​គោ​ទុក​គោរព​បូជា ។​ ប៉ុន្ដែ​បើ​តាម​វប្បធម៌​អារ្យធម៌​ខ្មែរ​របស់​បណ្ឌិត​ មីសែល​ ត្រាណេ​ បញ្ជាក់​ថា​ ព្រះ​គោ​ជា​អ្នកដឹកនាំ​សារ​របស់​សាសនិកជន​ទៅ​កាន់​ព្រះ​អាទិទេព​ និង​ជា​សត្វ​តំណាង​នូវ​សីលធម៌​ សុខភាព​រាបសា​លើស​អវតា​ផ្សេងៗ​ទៀត​ផង ។​

ក្នុង​សង្គម​ខ្មែរ​ ព្រះ​គោ​មាន​តួនាទី​ធ្វើ​ឲ្យ​លេច​សមតិកម្ម​សង្គម​ ដូច​ជា ​បុណ្យ​ទាន​ សំណង់​ស្ថាបត្យកម្ម​យ៉ាងច្រើន​នៅ​តាម​ប្រាសាទ​នានា​ ហើយ​ខ្មែរ​យើង​ពី​មុន​បាន​ចាត់​ទុក​ព្រះ​គោ​ ឬ​ក្របី​ជា​ទេវតា​ប្រចាំ​ត្រកូល​របស់​ខ្លួន​តាំង​មុន​ឥណ្ឌា​ចូល​ស្រុក​ម៉្លេះ​ ដោយសារ​មាន​លក្ខណៈ​ដិតដាម​នេះ​ហើយ​ ទើប​គេ​សង្កេត​ឃើញ​បុព្វបុរស​យើង​កសាង​រូប​ព្រះ​គោ​យ៉ាងច្រើន​នៅ​តាម​ខ្លោងទ្វារ​ប្រាសាទ​ និង​រូបចម្លាក់​សម្រាប់​គោរព​បូជា​តាំងពី​សម័យ​នគរ​ភ្នំ​រហូត​ដល់​សម័យ​មហានគរ ។​

រមណីយដ្ឋាន​ថាឡាបរិវ៉ាត់​គឺជា​កេរដំណែល​ប្រវត្ដិសាស្ដ្រ​ដ៏​ចំណាស់​តាំងពី​សម័យ​បុរាណ​ ហើយ​បច្ចុប្បន្ន​កំពុង​មាន​ឈ្មោះ​បោះ​សំឡេង​ក្នុង​ការ​ទាក់ទាញ​ភ្ញៀវ​ទេសចរ​ឲ្យ​ទៅ​កម្សាន្ដ​សប្បាយ​ និង​ស្វែង​យល់​ពី​ស្នាដៃ​បុព្វបុរស​ខ្មែរ ។​ ក្រៅពី​រមណីយដ្ឋាន​នេះ​ ខេត្ដស្ទឹងត្រែង​មាន​រមណីយដ្ឋាន​អូរ​ពងមាន់​ កោះ​ខ្សាច់​ វត្ដ​ហាំងខូបា​ និង​មាន​ប្រភព​ទឹក​ផលិត​វារីអគ្គិសនី​ទាញ​យក​ភ្លើង​សម្រាប់​ប្រើប្រាស់​ទៀត​ផង ៕

ប្រភពៈ  សាលអាន​ ថ្ងៃ​ទី​ ២៩/១២/០៦​ (អត្ថបទ​ដកស្រង់​ពី​កាសែត​កោះសន្ដិភាព)

Source: ប្រវត្ដិសាស្រ្ដ

Comments
Loading...