Ultimate magazine theme for WordPress.

- Advertisement -

ភ្នំគូលែនជាតំបន់ប្រកាសឯករាជ្យនាឆ្នាំ៨០២

0 20

សម័យ​អង្គរ​ដែល​ចាប់ផ្ដើម​ឡើង​ពី​រជ្ជកាល​ព្រះបាទ​ជ័យវរ្ម័ន​ទី​២ គឺ​នៅ​ឆ្នាំ​៨០២​នៃ​គ្រិស្ដសករាជ​ជា​ឆ្នាំ​ដែល​ស្ដេច​អង្គ​នេះ​ទ្រង់​យាង​មក​ពី​តំបន់​នៅ​ជ្រោយ​មាលយូ​ (ជ្វា) ហើយ​បាន​ប្រកាស​ឯករាជ្យ​ពី​ជ្វា​នៅ​លើ​ភ្នំ​គូលែន ។ ក្នុង​សម័យ​ដ៏​សំខាន់​នេះ គេ​បាន​ជួប​ប្រទះ​នូវ​វត្ដមាន​ព្រះរាជា​ខ្មែរ​មួយ​ព្រះ​អង្គ​ទៀត​ដែល​មាន​ឫទ្ធានុភាព​យ៉ាង​ក្លៀវក្លា​អស្ចារ្យ​គឺ​ព្រះបាទ​សុរិយោ​វរ្ម័ន​ទី​២ ​ដែល​ទ្រង់​ជា​ស្ថាបនិក​នៃ​ប្រាសាទ​នគរវត្ដ​និង​ប្រាសាទបឹងមាលា ។​

តាម​ប្រវត្ដិសាស្ដ្រ​ខ្មែរ​បាន​ឲ្យ​ដឹងផង​ដែរ​ថា មាន​ព្រះរាជា​ពីរ​ព្រះ​អង្គ​ទៀត​បាន​បន្ដ​អភិវឌ្ឍ​ការ​ស្ថាបនា​ប្រទេស​ជាតិ​តាម​លំនាំ​អតីត​ព្រះមហាក្សត្រ​ខ្មែរ​បុរាណ គឺ​ព្រះបាទ​ជ័យវរ្ម័ន​ទី​៤ ដែល​បាន​ស្ថាបនា​ទីក្រុង​កោះកេរ ។ ព្រះបាទ​ជ័យវរ្ម័ន​ទី​៧ បាន​ស្ថាបនា​ទីក្រុង​អង្គរ​ធំ​ឬ​ជ័យ​រាជធានី ក្រោយ​ពី​បាន​រំដោះប្រទេស​ជាតិ​ពី​ចម្បាំង​វាតទី​របស់​នគរ​ចម្ប៉ា​មក ។​

លោក​បណ្ឌិត មីសែល ត្រាណេ អ្នកឯកទេស​វប្បធម៌​ខ្មែរ​បាន​មាន​ប្រសាសន៍​ឲ្យ​ដឹង​ថា នា​មុន​សតវត្សរ៍​ទី​១៣​នៃ​គ្រិស្ដសករាជ ជន​ជាតិខ្មែរ​គឺជា​ជនជាតិ​ដ៏​ខ្លាំងពូកែ​ប្រកបដោយ​ទេព​កោសល្យ​ខ្ពង់ខ្ពស់​បំផុត ។ ទឹកដី​របស់​អតីត​ព្រះរាជាណាចក្រ​កម្ពុជា​មាន​ទំហំ​ដ៏​ធំ​មហាសាល គឺ​មាន​ផ្ទៃដី​រហូត​ដល់​ជាង​១.០០០.០០០​គីឡូម៉ែត្រ​ក្រឡា​ឯណោះ ។​

- Advertisement -

ដូច​កាលសម័យ​បុរេ​អង្គរ​ដែរ ចក្រភព​ខ្មែរ​សម័យ​អង្គរ​ជា​ក្សត្រ​រដ្ឋ​ដែល​ត្រូវ​បាន​បង្កើត​ឡើង​តាម​ការ​បង្រួបបង្រួម គឺ​ការ​ប្រមូលផ្ដុំ​រដ្ឋ​តូច​ធំ​ជា​ច្រើន ។ ក្នុង​បរិបទ​ភូមិសាស្ដ្រ​នៃ​ប្រវត្ដិសាស្ដ្រ​បុរាណ​នេះ​ហើយ ដូចដែល​បាន​ជួប​ប្រទះ​តាម​អត្ថបទ​សិលាចារឹក​នូវ​វត្ដមាន​ព្រះមហាក្សត្រ​ជា​ច្រើន​ព្រះ​អង្គ​ដែល​ទ្រង់​គ្រប់គ្រង​រដ្ឋ ឬ​បុរី​តូចៗ​មួយ​ចំនួន​នៅ​ជុំវិញ​ព្រះរាជ​ធានី រាជបុរី​អង្គរ​យសោធរបុរៈ ។

លោក​បណ្ឌិត​បាន​ឲ្យ​ដឹង​ទៀត​ថា ក្រៅពី​បុរី​តូច​ធំ​ដែល​សព្វថ្ងៃ​ស្ថិត​នៅ​ក្នុង​បង្គោល​សីមា​នៃ​ព្រះរាជាណាចក្រ​កម្ពុជា គេ​មាន​ឃើញ​ទី​ក្រុង​ឬ​នគរ​តូចៗ​មួយ​ចំនួន​ដែល​ស្ថិត​នៅ​ក្នុង​ប្រទេស​ឡាវ និង​ក្នុង​ប្រទេស​ថៃ​បច្ចុប្បន្ន ។ នេះ​មិន​ទាន់​និយាយ​ដល់​បុរាណ​ស្ថាន​ជា​ច្រើន​ទៀត​ដែល​បុព្វបុរស​ខ្មែរ​បាន​បន្សល់​ទុក​នៅ​ប្រទេស​វៀតណាម​ភាគ​ខាងត្បូង​ដែល​ដើម​ឡើយ គឺជា​ទឹកដី​របស់​ព្រះរាជាណាចក្រ​ខ្មែរ​ផង​នោះ​ទេ ៕

ប្រភពៈ  សាលអាន ថ្ងៃនេះ ១៦/០២/០៥ (ដកស្រង់​ពី​កាសែត​រស្មីកម្ពុជា)

Source: ប្រវត្ដិសាស្រ្ដ

Comments
Loading...