Ultimate magazine theme for WordPress.

- Advertisement -

អតីតរាជធានីខ្មែរបុរាណនៅអូរទង

0 21

ឈ្មោះ​ពី​បុរាណ​របស់​ទីក្រុង​អយុធ្យា គឺ​បឹង​ស្នោ នេះ​បើ​សំអាង​ទៅ​តាម​ឯកសារ​នា​សតវត្សរ៍​ទី​១៩​នៃ​គ្រិស្ដសករាជ ។ ក៏​ប៉ុន្ដែ​ស្រុក​មួយ​តូច​ដែល​បាន​ផ្សារ​ភ្ជាប់​ជាមួយ​ទីក្រុង​អូរទង​ដែល​សព្វថ្ងៃ​ជនជាតិ​ថៃ​ហៅ​ក្លាយមក​ថា «អ៊ូ​ថង» (តាម​សំនៀង​សៀម) ​គឺជា​រាជធានី​បុរាណ​របស់​ខ្មែរ​តាំងពី​សម័យ​នគរ​ភ្នំ​មក​ម៉្លេះ ។​

ដើម​ឡើយ ខេត្ដ​អយុធ្យា​ជា​ទឹកដី​របស់​ខ្មែរ​មុន​ឆ្នាំ​១៣៥០​នៃ​គ្រិស្ដសករាជ ។ នេះ​ជា​ការ​សំអាង​របស់​លោក​មូរ៉ា​ ដែល​ជា​ប្រវត្ដិវិទូ​ជនជាតិ​បារាំង ។ ទីក្រុង​បុរាណ​របស់​ខ្មែរ​នេះ​បាន​ផ្លាស់​ប្ដូរ​ទ្រង់ទ្រាយ ឬ​ទម្រង់​ដើម​យ៉ាង​ឆាប់រហ័ស​នោះ​ដោយសារ​តែ​ការ​វិវឌ្ឍ​តាម​បែប​សម័យ​ទំនើប ចាប់​តាំង​ពី​ឆ្នាំ​១៩៤៥​មក ។​

អ្នកឯកទេស​ខាង​វប្បធម៌​ខ្មែរ​បាន​ឲ្យ​ដឹង​ថា ការ​ស្វះ​ស្វែងរក​ឯកសារ​ប្រវត្ដិសាស្ដ្រ​ឲ្យ​បាន​ច្បាស់លាស់​ស្ដីពី​អតីត​ទីក្រុង​បុរាណ​របស់​ខ្មែរ​ដូច​ខាងលើ ចៀសវាង​ការ​ចោទប្រកាន់​ពី​មជ្ឈដ្ឋាន​ណាមួយ​នោះ ការងារ​នេះ​ត្រូវ​បាន​ចំណាយ​ពេលវេលា​អស់​រយៈពេល​១៥​ឆ្នាំ ។ ​ដែល​ការ​ស្រាវជ្រាវ​បាន​ចាប់ផ្ដើម​តាំងពី​ឆ្នាំ​១៩៧៦ បន្ដ​រហូត​ដល់​ឆ្នាំ​១៩៩០ ទើប​សម្រេច​ប្រមូល​បាន​ឯកសារ​ទាំង​អស់នេះ ។​

​លោក​បណ្ឌិត​មីសែល ត្រាណេ អ្នកឯកទេស​ខាង​វប្បធម៌​ខ្មែរ​បាន​មាន​ប្រសាសន៍​ឲ្យ​ដឹង​បន្ថែម​ថា ការ​បាត់បង់​ទីក្រុង​អយុធ្យា​ដ៏​មាន​ឈ្មោះ​ល្បី​របស់​ខ្មែរ​បុរាណសម័យ​នោះ​ដោយសារ​តែ​មាន​ការ​បែកបាក់​គ្នា​រវាង​ព្រះរាជ​វង្សានុវង្ស តាម​ការ​បំបែក​បំបាក់​របស់​អ្នក​ដឹក​នាំ​សៀម​ (ថៃ) ។ ព្រោះ​សៀម​មាន​ឥទ្ធិពល​លើ​ខ្មែរ​ក្នុង​អតីតកាល​ដែល​បង្ក​ឲ្យ​អំណាច​ឫទ្ធានុភាព​របស់​ខ្មែរ​ចាប់ផ្ដើម​ចុះ​ទន់ខ្សោយ​បន្ដិច​ម្ដងៗ ហើយ​នៅ​ឆ្នាំ​១៣៥០​នៃ​គ្រិស្ដសករាជ ទីក្រុង​នេះ​ក៏​ត្រូវ​សៀម​ដែល​ដឹកនាំ​ដោយ​ព្រះបាទ​អ៊ូថង ដណ្ដើម​យក​បាន​ទាំង​ស្រុង ។​

- Advertisement -

លោក​បណ្ឌិត​អ្នកឯកទេស​ខាង​វប្បធម៌​ខ្មែរ​បាន​បញ្ជាក់ថា នៅ​លើ​ទឹកដី​នៃ​ទីក្រុង​អយុធ្យា ជាទី​ក្រុង​របស់​ខ្មែរ​បុរាណ​នេះ គេ​តែង​រក​ឃើញ​ចម្លាក់​ខ្មែរ​នៅ​គ្រប់​យុគសម័យ ។ វត្ដ​មហាធាតុ​ក្នុង​ខេត្ដ​អយុធ្យា ដែល​ធ្លាប់​មាន​កេរ្តិ៍​ឈ្មោះ​ល្បីល្បាញ​ជាងគេ គឺជា​ប្រាសាទ​របស់​ព្រះបាទ​ជ័យវរ្ម័ន​ទី​៧ ដែល​ទ្រង់​បាន​ស្ថាបនា​ឡើង​ដើម្បី​ឧទ្ទិស​ចំពោះ​ព្រះពុទ្ធ​សាសនា​មហាយាន ។​

ក្នុង​អំឡុង​ឆ្នាំ​១៩៦០ នៃ​គ្រិស្ដសករាជ តាម​ការ​ជីក​កកាយ​ក្នុង​ប្រាសាទ​ខាងលើ​ក៏​ដូច​ជា​ប្រាសាទ​ដទៃ​ទៀត​រួម​មាន ប្រាសាទ​នៃ​វត្ដ​ព្រះរាជ​បូព៌ា គេ​សង្កេត​ឃើញ​មាន​វត្ថុ​បុរាណ​ខ្មែរ ថៃ និង​ចិន​យ៉ាងច្រើន​សន្ធឹកសន្ធាប់ ។ ក្នុង​ចំណោម​វត្ថុ​បុរាណ​ទាំង​ប៉ុន្មាន​នោះ គេ​បាន​ប្រទះ​ឃើញ​ចម្លាក់​ព្រះពុទ្ធ​អង្គ​ទ្រង់​ស្ថិត ឬ​ទ្រង់​ព្រះ​ភ្នែន ធ្វើ​ពី​មាស និង​សន្លឹក​មាស​ដែល​មាន​លក្ខណៈ​ជា​សិល្បៈ​ខ្មែរ​នា​សម័យ​វប្បធម៌​បាយ័ន ៕

ប្រភពៈ  សាលអាន ថ្ងៃនេះ ១៤/០២/០៥ (ដកស្រង់​ពី​កាសែត​រស្មីកម្ពុជា)

Source: ប្រវត្ដិសាស្រ្ដ

Comments
Loading...