Ultimate magazine theme for WordPress.

- Advertisement -

ខ្មែរសម័យអង្គរទទួលទានអាហាររបៀបណា ?

0 21

នៅ​សម័យ​អង្គរ​នា​សតវត្សរ៍​ទី​១២ ដល់​សតវត្សរ៍​ទី​១៣ ជនជាតិ​ខ្មែរ​សម័យ​នោះ ពេល​ទទួលទាន​អាហារ គឺ​មាន​លក្ខណៈ​ជាសកល​មិន​ខុស​ពី​ជនជាតិ​អឺរ៉ុប ឬ​ជនជាតិ​ដទៃ​ទៀត​ឡើយ ។ ការ​ទទួល​ទាន​អាហារ​ដែល​ពាក្យ​សាមញ្ញ​តែង​ប្រើ​នៅ​សម័យ​បុរាណ​ថា ស៊ី​ចុក វា​ជា​ប្រពៃណី​ថ្លៃថ្នូរ​ធម្មតា​តែ​ប៉ុណ្ណោះ មិន​អាច​ចាត់​ទុក​ថា​មាន​លក្ខណៈ​អន់​ថយ ឬ​ជឿនលឿន​ពេក​នោះ​ទេ ។​

ផ្អែក​តាម​ចម្លាក់​ប្រាសាទបាយ័ន​បាន​បង្ហាញ​នូវ​ទិដ្ឋភាព​ជីវិត​ប្រចាំ​ថ្ងៃ​របស់​ជនជាតិ​ខ្មែរ​បុរាណ គឺ​ការ​ធ្វើ​ម្ហូបអាហារ​និង​ការ​ជួបជុំ​គ្នា​ទទួលទាន​បាយ​ឬ​ពាក្យ​ប្រើ​សាមញ្ញ​ថា ស៊ី​ចុក ។ ពិតមែន​ហើយ​ថា រូបភាព​ជនជាតិ​ខ្មែរ​បុរាណ​ការ​ទទួលទាន​បាយ​ដោយ​ប្រើ​ដៃ​របស់​ជនជាតិ​ខ្មែរ​សម័យ​អង្គរ​កំពុង​ទទួលទាន​បាយ​ត្រូវ​បាន​គេ​យល់​ដឹង​រួច​ហើយ តែ​អត្ថន័យ​ស្ដីពី​របៀប​បរិភោគ​អាហារ​របស់​ខ្មែរ​បុរាណ​មាន​លក្ខណៈ​ដូច​ខ្មែរ​សម័យ​ទំនើប​ឬ​យ៉ាងណា​នោះ វា​ជាបញ្ហា​ដែល​ត្រូវ​យល់​ដឹងផង​ដែរ ។​

លោក​បណ្ឌិត​មីសែល ត្រាណេ អ្នកឯកទេស​ខាង​វប្បធម៌​ខ្មែរ​បាន​មាន​ប្រសាសន៍​ឲ្យ​ដឹង​ថា បច្ចុប្បន្ន​នេះ គេ​គ្រប់​គ្នា​ទទួលស្គាល់​ថា​ជា​សម័យ​ទំនើប​សម័យ​កុំព្យូទ័រ​ដែល​ជីវភាព​រស់នៅ​ប្រចាំ​ថ្ងៃ​របស់​ពលរដ្ឋ​គ្រប់​ជាតិ​សាសន៍​មាន​ភាព​ជឿនលឿន​ហើយ ។ ជាមួយ​នេះ​ដែរ ក៏​គេ​ចង់​ដឹង​ថា តើ​ខ្មែរ​បុរាណ​មាន​របៀប​ទទួលទាន​បាយ​យ៉ាងណា ?

តាម​ចម្លាក់​នៅ​ប្រាសាទបាយ័ន​បាន​ពណ៌នា​ឲ្យ​ដឹង​ថា ការ​ជួបជុំ​របស់​ជនជាតិ​ខ្មែរ​សម័យ​អង្គរ គេ​ទទួលទាន​បាយ​ (បរិភោគ​បាយ) ​គឺ​ប្រើ​ដោយ​ដៃ​ផ្ទាល់ ។ ខ្មែរ​បុរាណ​មិន​ប្រើ​ស្លាបព្រា សម ឬចង្កឹះ​ទេ ។ ការ​បរិភោគ​អាហារ​ដោយ​ប្រើ​ដៃ​នេះ ខ្មែរ​នៅ​ជនបទ​ស្រុកស្រែ​ចម្ការ ក៏​នៅ​តែ​ទទួលទាន​បាយ​ដោយ​ប្រើ​ដៃ​ផ្ទាល់​មាន​ចំនួន​ភាគច្រើន​ផង​ដែរ ។​

- Advertisement -

លោក​បណ្ឌិត​មីសែល ត្រាណេ​ បាន​ពន្យល់​ឲ្យ​ដឹង​បន្ថែម​ទៀត​ថា នា​អំឡុង​សតវត្សរ៍​ទី​១២-១៣ ការ​បរិភោគ​បាយ​ដោយ​ប្រើ​ដៃ​ផ្ទាល់​ពុំ​មែនមាន​តែ​ខ្មែរ​បុរាណ​នោះ​ទេ សូម្បី​​តែ​ជនជាតិ​អឺរ៉ុប​ដែល​និយម​ប្រើ​ស្លាបព្រា សម នា​ពេល​សព្វ​ថ្ងៃនេះ​ ក៏​កាល​ណោះ​គេ​ទទួលទាន​បាយ​ដោយ​ដៃ​ផ្ទាល់​ដូច​ខ្មែរ​ដែរ ។ លោក​ត្រាណេ​បាន​ឲ្យ​ដឹង​ទៀត​ថា ការ​ទទួលទាន​បាយ​ដោយ​ប្រើ​ដៃ គឺ​ជា​ប្រពៃណី​របស់​ជនជាតិ​ខ្មែរ​តាំងពី​បុរាណ​នា​សម័យ​អង្គរ​មក​ម៉្លេះ ។​

របៀប​ទទួលទាន​បាយ​បែប​នេះ​ក៏​នៅ​តែ​មាន​បន្ដ​មក​ទល់​ពេល​សព្វថ្ងៃ​ទៀត​ចំពោះ​ខ្មែរ​នៅ​តាម​ជនបទ ។ សម្ភារៈ​ដាក់​បាយ សម្ល គេ​តែង​ដាក់​លើ​អ្វី​ខ្ពស់​បន្ដិច ដូច​ជា​កូន​តុ គេ​និយម​ហៅ​ស្ពក ដែល​មាន​រាង​មូល​ឬ​បួន​ជ្រុង ។ នៅ​ជាមួយ​អ្នក​បរិភោគ​នោះ​ដែរ គេ​សង្កេត​ឃើញ​មាន​ក្អម​ទឹក​មួយ​និង​ផ្ដិល​ទឹក​ធ្វើ​ពី​លលាដ៍ដូង​មាន​ពណ៌​ខ្មៅ​រលោង ។​

​ការ​ទទួលទាន​អាហារ​ដោយ​ប្រើ​ដៃ​ដូចនេះ អ្នកឯកទេស​ខាង​វប្បធម៌​ខ្មែរ​បាន​ចាត់​ទុក​ថា វា​មាន​តម្លៃ​សិល្បៈ​ជា​លក្ខណៈ​សកល ។ ​ព្រោះ​នៅ​សម័យ​ចក្រភព​អង្គរ ទាំង​នៅ​ប្រទេស​អឺរ៉ុប​-​អាស៊ី ទាំង​អ្នក​មាន​ឋានៈ​ខ្ពស់ អភិជន​និង​ព្រះមហាក្សត្រ រហូត​ដល់​ប្រជាជន​សាមញ្ញ ពេល​ទទួលទាន​អាហារ គេ​ប្រើ​ដៃ​សម្រាប់​ចាប់​ម្ហូបអាហារ​ដោយហេតុ​ថា នេះ​ជា​ទម្លាប់​ពី​ធម្មជាតិ ៕

ប្រភពៈ  ​សាលអាន​ថ្ងៃទី​២៨/០២/០៥ (ដកស្រង់​ពី​កាសែត​រស្មីកម្ពុជា)

Source: ប្រវត្ដិសាស្រ្ដ

Comments
Loading...