Ultimate magazine theme for WordPress.

- Advertisement -

ខ្មែរចេះផលិតក្បឿងពីដើមសម័យប្រវត្ដិសាស្ដ្រ

0 23

រូបចម្លាក់​ផ្ទះ​ប្រក់​ក្បឿង នា​សម័យ​ប្រវត្ដិសាស្ដ្រ​

ផ្ទះ​ខ្មែរ​នា​សម័យ​នគរ​ភ្នំ​មាន​ពីរ​ប្រភេទ គឺ​ផ្ទះ​ធ្វើ​ពី​ឈើ និង​ដី​ប្រក់​ក្បឿង ។ លំនៅ​ស្ថាន​របស់​ខ្មែរ​បុរាណ​ទាំង​ពីរ​ប្រភេទ​នេះ​ពាក់ព័ន្ធ​នឹង​ស្នាដៃ​ផលិត​ក្បឿង ដែល​ខ្មែរ​មានគំនិត​ច្នៃប្រឌិត​ក្នុង​ការងារ​សង្គម ។ តាម​ការ​ស្រាវជ្រាវ​របស់​អ្នក​បុរាណវិទ្យា និង​អ្នកឯកទេស​ខាង​វប្បធម៌​ខ្មែរ​បាន​ឲ្យ​ដឹង​ថា ការ​សាងសង់​លំនៅ​ស្ថាន​ធ្វើ​ពី​ឈើ និង​មាន​សភាព​ខ្ពស់​ពី​ដី​គឺជា​ប្រពៃណី​របស់​ខ្មែរ ដែល​លំនៅ​ស្ថាន​ធ្វើ​ពី​ឈើ​នេះ​មាន​ប្រក់​ក្បឿង និង​ប្រក់​ស្លឹក ។​

រីឯ​លំនៅ​ស្ថាន​ប្រភេទ​ទី​ពីរ គឺជា​ការ​សាងសង់​ដោយ​ដី ឬ​ឥដ្ឋ និង​ប្រក់​ក្បឿង ។ ក្បឿង​បុរាណ​ត្រូវ​បាន​ផលិត​ឡើង​ដោយ​ដី​ដុត ។ លក្ខណៈ​លំនៅ​ស្ថាន​ខ្មែរ​បុរាណ​បែប​នេះ​ក៏​មាន​ការ​កត់​សម្គាល់​នៅ​ក្នុង​កំណត់ហេតុ​របស់​ចិន​កាលពី​សម័យ​នគរ​ភ្នំ ឬ​ហៅ​សម័យ​ហ្វូណន ផង​ដែរ ។

- Advertisement -

លោក​បណ្ឌិត​មីសែល ត្រាណេ អនុប្រធាន​គណៈកម្មការ​ជាតិ​កម្ពុជា​សម្រាប់​យូនីស្កូ និង​ជា​អ្នក​ឯកទេស​ខាង​វប្បធម៌​ខ្មែរ​បាន​ឲ្យ​ដឹង​ថា ចម្លាក់​គេហដ្ឋាន​បុរាណ​ដំបូល​មាន​ប្រក់​ក្បឿង​ត្រូវ​បាន​គេ​រក​ឃើញ​នៅ​រាជធានី​អង្គរបុរី​ខេត្ដតាកែវ ។ ​លោក​បណ្ឌិត​បាន​ឲ្យ​ដឹង​ទៀត​ថា ភាព​ជឿនលឿន​របស់​ខ្មែរ​បុរាណ​ចេះ​ផលិត​ក្បឿង​ធ្វើ​ពី​ដី​ដុត​ដែល​ចាប់ផ្ដើម​ឡើង​តាំងពី​ដើម​សម័យ​ប្រវត្ដិសាស្ដ្រ បាន​បន្ដ​រហូត​មក​ដល់​សម័យ​អង្គរ និង​ក្រោយ​អង្គរ ។ មិន​ត្រឹមតែ​ប៉ុណ្ណោះ​ការ​និយម​គេហដ្ឋាន​មាន​ដំបូល​ប្រក់​ក្បឿង​បាន​បន្ដ​រហូត​មក​ដល់​សម័យ​បច្ចុប្បន្ន ។ ការ​ចេះ​ច្នៃប្រឌិត​ក្នុង​ការ​ផលិត​ក្បឿង​ដំបូលផ្ទះ​មាន​ភាព​រីក​ចម្រើន​បែប​នេះ គឺជា​ឫស​គល់​នៃ​វប្បធម៌​ខ្មែរ​ដែល​មាន​តាំងពី​សម័យ​នគរ​ភ្នំ​មក ៕

ប្រភពៈ  សាលអាន ថ្ងៃទី ២៣/១១/០៥ (ដកស្រង់​ពី​កាសែត​រស្មីកម្ពុជា)

Source: ប្រវត្ដិសាស្រ្ដ

Comments
Loading...