Ultimate magazine theme for WordPress.

- Advertisement -

ប្រវត្តិដ៏យូរលង់នៃសិលាចារឹកវត្ដព្រះវិហារសួគ៌

0 13

សំណល់​វត្ថុ​បុរាណ​នៃ​ប្រាសាទព្រះវិហារសួគ៌ ដែល​ស្ថិត​នៅ​ត្រើយម្ខាង​នៃ​ដង​ទន្លេ​មេគង្គ​បាន​បង្ហាញ​ឲ្យ​ដឹង​ថា វត្ដ​នេះ​បាន​ស្ថាបនា​ឡើង​នៅ​ក្នុង​សម័យ​លង្វែក បន្ទាប់​មក​ត្រូវ​បាន​ជួសជុល​នៅ​ក្នុង​សតវត្សរ៍​ទី​២០​នៃ​គ្រិស្ដសករាជ ។ អ្វី​ដែល​គួរ​ឲ្យ​កត់សម្គាល់​លើស​ពី​នេះ​ទៅ​ទៀត​នោះ គឺ​វត្ដ​ព្រះ​វិហារ​សួគ៌​បាន​សាងសង់​នៅ​លើ​ទីតាំង​បុរាណ​ស្ថិត​នៅ​ក្នុង​រចនាបថ​សម្បូណ៌​ព្រៃគុហ៍ ។​

វត្ដ​ព្រះ​វិហារ​សួគ៌ មាន​ចម្ងាយ​ប្រមាណ​ជា​១៨​គីឡូម៉ែត្រ​ពី​ស្ពាន​ជ្រោយចង្វា រាជធានី​ភ្នំពេញ ជាវត្ត​មួយ​ដែល​មាន​ប្រវត្ដិសាស្ដ្រ​ជា​យូរលង់​ណាស់​មក​ហើយ ។ មាន​របស់របរ វត្ថុ​បុរាណ​ជា​ច្រើន​ដែល​នៅ​សេសសល់​ក្នុង​បរិវេណ​នៃ​វត្ដ​នេះ​ ដូច​ជា​ចំណែក​នៃ​ក្បាច់​ផ្ដែរ សិលាចារឹក​ជា​ភាសាសំស្ក្រឹត ព្រមទាំង​គំនរ​ឥដ្ឋ​ដែល​បាន​បញ្ជាក់​ពី​អាយុកាល​ដ៏​ចំណាស់​របស់​វត្ដ​នេះ​ដែល​មាន​កំណើត​តាំងពី​សតវត្សរ៍​ទី​៦-ទី​៧​នៃ​គ្រិស្ដសករាជ​មក​ម៉្លេះ ។ រហូត​មក​ដល់​ពេល​នេះ​វត្ដ​ព្រះ​វិហារ​សួគ៌​មាន​អាយុកាល​ជាង​១.០០០​ឆ្នាំ​មក​ហើយ ហើយ​ត្រូវ​បាន​រង​នូវ​ការ​ខូចខាត​យ៉ាងដំណំ​ដោយសារ​ភ្លើងសង្គ្រាម​ផង​ដែរ ហើយ​កាន់តែ​ធ្ងន់ធ្ងរ​ទៅ​ទៀត​នោះ​គឺ​នៅ​ក្នុង​របប​ខ្មែរក្រហម​តែ​ម្ដង ។ តែ​ទោះបីជា​យ៉ាងណា​ក្ដី​ក៏​ស្លាកស្នាម​នៃ​វប្បធម៌​បុរាណ​មួយ​ចំនួន​នៅ​ក្នុង​បរិវេណ​វត្ដ​ត្រូវ​បាន​រក្សា​ទុក​រហូត​មក​ដល់​បច្ចុប្បន្ន ។​

- Advertisement -

លោក​បណ្ឌិត​មីសែល ត្រាណេ បាន​មាន​ប្រសាសន៍​ឲ្យ​ដឹង​បន្ទាប់​ពី​បាន​ទៅ​ទស្សនា​នៅ​ទីនោះ​ថា សម្បត្ដិ​វប្បធម៌​របស់​ជាតិ​ដ៏​សំខាន់​នៅ​ក្នុង​បរិវេណ​វត្ដ​នោះ​គឺជា​សិលាចារឹក ។ មាន​សិលាចារឹក​ចំនួន​២​ផ្ទាំង​ត្រូវ​បាន​ព្រះសង្ឃ​គង់​នៅ​វត្ដ​នោះ​រក្សា​ទុក​គង់​វង្ស​ល្អ​ណាស់ ដែល​ផ្ទាំង​ទី​១​ធ្វើ​ពី​ថ្មខ្មៅចារ​ឡើង​នៅ​ក្នុង​សតវត្សរ៍​ទី​៧​នៃ​គ្រិស្ដសករាជ ។ សិលាចារឹក​មួយ​ផ្ទាំង​នេះ​គឺជា​និមិត្ដរូប​នៃ​ចម្លាក់​លិង្គព្រះឥសូរ និង​យោនី​នាង​ឧម៉ា​ជាប់​គ្នា ។ សិលាចារឹក​នេះ​ជា​បំណែក​ស្នាន​ទ្រោណ៌ គឺជា​សញ្ញា​និមិត្ដ​នៃ​កេរ្ដិ៍ខ្មាស​របស់​ព្រះ​នាង​ឧម៉ា​និង​អង្គ​ជាតិ​របស់​ព្រះ​សិវៈ ។ រីឯ​ផ្ទាំង​ទី​ពីរ គឺជា​ផ្ទាំង​ឈើ​ក្នុង​ទម្រង់​អក្សរ​សម័យ​ទំនើប ក៏​ប៉ុន្ដែ​មាន​លក្ខណៈ​ប្រកបដោយ​ប្រវត្ដិ​សាស្ដ្រ​យ៉ាង​ច្បាស់លាស់ ។ ខ្លឹមសារ​នៅ​លើ​ផ្ទាំង​ទី​២​នេះ គឺ​មាន​ទាក់ទង​ទៅ​នឹង​ប្រវត្ដិ​វត្ដ​ព្រះ​វិហារ​សួគ៌​ផ្ទាល់​ទៀត​ផង ។ នៅ​ក្នុង​ពេល​ទៅ​ទស្សនា​នៅ​វត្ដ​ព្រះ​វិហារ​សួគ៌​នោះ​ដែរ លោក​បណ្ឌិត​បាន​ថ្លែង​អំណរគុណ​យ៉ាង​ជ្រាលជ្រៅ​ចំពោះ​ចៅអធិការ​វត្ដ ដែល​ព្រះ​អង្គ​មាន​មនសិការ និង​ភាព​ឈ្លាសវៃ​ក្នុង​ការ​អភិវឌ្ឍន៍​វត្ដ​អារាម​នោះ ៕

ប្រភពៈ  សាលអាន ថ្ងៃទី ៣០/១២/០៥ (ដកស្រង់​ពី​កាសែត​រស្មីកម្ពុជា)

Source: ប្រវត្ដិសាស្រ្ដ

Comments
Loading...