Ultimate magazine theme for WordPress.

ព្រះ​ពុម្ព​ក្នុង​ឥរិយាបថ​វរទ​ឬ​វរមុទ្រា​និង​ព្រះ​ពុម្ព​សម្ដែង​ព្រះធម៌​ចក្រ





វរទមុទ្រា ​ឬ ​វរមុទ្រា​ គឺជា​ត្រា​ដែល​តំណាង​ឲ្យ​សប្បុរសធម៌​ឬ​ទាន​របស់​ព្រះ​អង្គ​ប្រទាន ។​ តាម​ពិត​ទៅ ពាក្យ​ «វរ» ​នៅ​ទី​នេះ​មាន​ន័យ​ថា ជម្រើស ឬ​វត្ថុ​ដែល​គេ​ជ្រើសរើស ។ ​រីឯ​ឥរិយាបថ​មួយ​ទៀត​នៃ​ព្រះពុទ្ធ​អង្គ​ដែល​គេ​តំណាង​លើ​ព្រះ​ពុម្ព​គឺ​ព្រះពុទ្ធ​អង្គ​កំពុង​សម្ដែង​ព្រះធម៌​ចក្រ ។ ​តើ​ហេតុ​ដូច​ម្ដេច​ទៅ​ដែល​គេ​ហៅ​ថា​ព្រះ​អង្គ​សម្ដែងធម៌​ចក្រ ?

យោង​ទៅ​តាម​ការ​សិក្សា​ស្រាវជ្រាវ​របស់​បណ្ឌិត​មីសែល ត្រាណេ ជំនាញ​ខាង​ប្រវត្ដិសាស្ដ្រ​កម្ពុជា ​បាន​បង្ហាញ​ថា នៅ​លើ​ព្រះ​បដិមា​ពុម្ព​បុរេ​អង្គរ គេ​ឃើញ​ព្រះ​អង្គ​ទ្រង់​ឈរ​ដៃស្ដាំ​សំយុង​ចុះ​ក្រោម​ដោយ​ប្រអប់ដៃ​លា ។​ រីឯ​ម្រាមដៃ​វិញ​មាន​សភាព​លាត​មិនមែន​ឱបរឹត​ទេ ។

លោកបណ្ឌិត​បាន​ឲ្យ​ដឹង​ទៀត​ថា ជា​ទូទៅ​ឥរិយាបថ​នៃ​ព្រះពុទ្ធ​អង្គ​ខាងលើ​ តំណាង​ឲ្យ​ឥទ្ធិបាទ​ធម៌​ដ៏​មហាប្រសើរ​របស់​ព្រះពុទ្ធ​អង្គ ​ព្រោះថា​កាលបើ​ព្រះ​អង្គ​មានធម៌​ជា​ទាន ​ព្រះ​អង្គ​អាច​ប្រោស​សត្វលោក​ទាំងពួង​យ៉ាងច្រើន​ឥត​គណនា​ដែរ ។​ ន័យ​ម្យ៉ាងទៀត គឺ​ធម៌​ជា​ទាន​របស់​ទ្រង់​នោះ អាច​កើតឡើង​ដល់​បុគ្គល នៅ​ពេល​ណា​គេ​គោរព​ប្រតិបត្ដិ​តាម​ព្រះ​ឱវាទ​របស់​ព្រះ​បរមគ្រូ​នៃ​យើង ។ ដូច្នេះ​ហើយ​បានជា​ឥរិយាបថ​ខាងលើ​នេះ​សំដៅ​ឲ្យ​ទាន​ដែល​ព្រះពុទ្ធ​អង្គ​ប្រទាន​ដល់​មនុស្ស​ទាំងពួង​ដោយ​ក្ដី​សន្ដោស​ឬ​មេត្ដាធម៌​ឥត​ព្រំដែន ។​

ទាក់ទង​សំណួរ​ខាង​ដើម​ លោក​បណ្ឌិត​មីសែល ត្រាណេ បាន​លើក​ឡើង​ថា ព្រះពុទ្ធ​អង្គ​ជា​ក្សត្រ​ក្លិង្គ​មួយ​ព្រះ​អង្គ​ ហើយ​ជា​ព្រះរាជបុត្រ​របស់​ព្រះសុទ្ធោទន ​ដែល​ស្ថិត​ក្នុង​រាជវង្ស​នាម​គោតម ដោយ​មាន​ត្រកូល​សាក្យ ។ ព្រះពុទ្ធ​បាន​ប្រសូត​នៅ​ទីក្រុង​កបិលពស្ដុ នៅ​ឧទ្យាន​លុម្ពិនី ។ នៅ​ពេល​ទ្រង់​ចម្រើន​វ័យ​កាលណា​មក ​ព្រះ​អង្គ​មិន​ស្រប​មតិ​ជាមួយនឹង​ពួក​ព្រាហ្មណ៍​ដែល​និយម​ប្រព្រឹត្ដ​តបៈ​ហួសហេតុ​គ្មាន​តុល្យភាព ​ពោល​គឺ​ជួនកាល​ក្ដៅ​ពេក​ ជួនកាល​ត្រជាក់​ពេក​ ក្នុង​ការ​ស្វែងរក​ព្រះ​និព្វាន​ឬ​មោក្ស​ឲ្យ​បាន​លឿន​រហ័ស ។ ​លោក​បាន​បន្ត​ទៀត​ថា ​ព្រះ​អង្គ​ក៏​ស្ដេច​យាង​ចាក​ចេញពី​ព្រះ​ដំណាក់​ ហើយ​ចូល​ព្រៃ​ដើម្បី​ស្វែងរក​ផ្លូវ​មធ្យម​មួយ​ទៀត​ខុស​ពី​តបៈ​កម្ម​ដែល​អាច​នាំ​ឲ្យ​ទ្រង់​ចាក​ផុត​ពី​ទុក្ខ​ភ័យ​យាយី​បាន ។​

លោក​បណ្ឌិត​បាន​រំលឹក​អំពី​ទានបារមី​របស់​ទ្រង់​ថា ​ផ្លូវ​កណ្ដាល​ឬ​មធ្យម​គឺជា​ផ្លូវ​មួយ​ដែល​មិន​ត្រេកត្រអាល​នឹង​កាមគុណ​ពេក​ទេ​ ហើយ​ក៏​មិន​ធ្វើបាប​កាយ​ពេក​ដែរ ហើយ​ម្យ៉ាង​វិញទៀត​ការ​ប្រតិបត្ដិ​មាគ៌ា​នេះ​បាន​នាំ​មក​នូវ​ការ​យល់​ភ្លឺ​ច្បាស់​ឬ​ការ​ត្រាស់​ដឹង ។​

ក្រោយ​ពី​ទទួល​បាន​នូវ​ការ​ត្រាស់​ដឹង​រួច​មក​ ព្រះពុទ្ធ​អង្គ​ក៏​សម្រេច​ព្រះ​ទ័យ​សម្ដែង​ព្រះធម៌​ ពោល​គឺ​ពន្យល់​ធម៌​ទៅ​មនុស្ស​ផង​ទាំងឡាយ​ទៅ​តាម​សំណូមពរ​របស់​សាវ័ក​ខ្លះ ។​ អ្វីមួយ​ដែល​គេ​ឲ្យ​ឈ្មោះ​ថា​ «ការ​សម្ដែងធម៌​ចក្រ​ដំបូង​បង្អស់​ក្នុង​ឧទ្យាន​មួយ​នៅ​ជិត​ពារាណសី» ។​

សេចក្ដី​ដូចដែល​បាន​ពោល​ខាងលើ​នេះ​ លោក​បណ្ឌិត​បាន​លើក​ឡើង​ទៀត​ថា​ វិចិត្រករ​ខ្មែរ​បុរាណ​នា​សម័យ​បុរេ​អង្គរ​ដែល​ជា​ពុទ្ធបរិស័ទ​ដ៏​ជ្រះថ្លា​ បាន​ឆ្លាក់​ព្រឹត្ដិការណ៍​ដ៏​សំខាន់​នេះ​យ៉ាង​ប្រាកដ ដើម្បី​ទុកជា​គ្រឿង​គោរព​ទី​សក្ការៈបូជា​ដោយ​ព្រះ​ពុម្ព​ប្រតិបត្ដិ​តាម​គន្លង​នៃ​ពុទ្ធប្បវត្ដិ ។​

នៅ​ក្នុង​ន័យ​ខាងលើ​នេះ​ដែរ​ លោក​មីសែល បាន​ឲ្យ​ដឹង​ទៀត​ថា នៅ​លើ​ចម្លាក់​ព្រះ​ពុម្ព​ដែល​តំណាង​ធម៌​ចក្រ គេ​ឃើញ​ព្រះពុទ្ធ​អង្គ​ស្ថិត​ក្នុង​ឥរិយាបថ​ប្រៀនប្រដៅ​មនុស្សលោក​ដើម្បី​រំដោះទុក្ខ​របស់​សត្វលោក​នៃ​យើង ។​ នៅ​ទី​នេះ​ព្រះ​អង្គ​គង់​ប្រថាប់​លើ​បល្ល័ង្ក​តាម​របៀប​អឺរ៉ុប​ ដោយ​សំយុងជើង​ចុះ​ក្រោម​ ដៃ​ព្រះ​អង្គ​កំពុង​ធ្វើ​ចលនា​បង្វិល​កងចក្រ​នៃ​ធម៌​ឲ្យ​ធ្វើ​ដំណើរ ។ ម្យ៉ាង​វិញទៀត ​ការ​សម្ដែងធម៌​ចក្រ​នេះ​ក៏​ត្រូវ​គេ​ប្រដូច​ទៅ​នឹង​ការ​សម្ដែង​ព្រះធម៌​លើក​ដំបូង​បង្អស់​ដែរ នៅ​ទីក្រុង​ស៌ានាថ​ជិត​ពារាណសី​ក្បែរ​ស្ថានីយ​បតនៈ​នៅ​ឧទ្យាន​ប្រើស ។​

តាម​ឥរិយាបថ​ជា​និមិត្ដរូប​នៃ​ធម៌​ចក្រ​នេះ លោក​បណ្ឌិត​បាន​កត់​សម្គាល់ថា ដៃ​ទាំង​ពីរ​របស់​ព្រះពុទ្ធ​អង្គ​ស្ថិត​នៅ​មុខ​ដើមទ្រូង​ ចុង​ម្រាមដៃ​ឆ្វេង​ប៉ះ​ទល់​ទៅ​នឹង​ប្រអប់​ដៃស្ដាំ ។ គួរ​បញ្ជាក់​ផង​ដែរ​ថា ជួនកាល​វិចិត្រ​សិល្បករ​បុរាណ​យើង​កសាង​តំណាង​ព្រះ​អង្គ​អង្គុយ​ក្នុង​ឥរិយាបថ​វជ្រាសនៈ​ ដោយ​មាន​ជើង​ទាំង​ពីរ​គងលើគ្នា ។​

ជា​ចុង​ក្រោយ​ បុរាណ​វិទូ​យើង​សរុបសេចក្ដី​ថា អ្នក​ដែល​បាន​ស្ដាប់​ការ​ទេសនា​ព្រះធម៌​ទាំងនោះ​ពិតជា​មាន​ការ​ភ្ញាក់រលឹក ហើយ​ប្រកបដោយ​ទឹកចិត្ដ​ជ្រះថ្លា​ ហើយ​ក៏​អាច​ក្លាយ​ខ្លួន​ជា​សិស្ស​នៃ​ព្រះ​បរមគ្រូ​នៃ​យើង​ ហើយ​ក៏​អាច​ក្លាយ​ខ្លួន​ទៅ​ជា​អ្នកបួស​ជា​ព្រះសង្ឃ​ផង​ដែរ ៕

ប្រភពៈ  សាលអាន ថ្ងៃ​ទី​២៣/០១/២០០៨ (ដកស្រង់​ពី​កាសែត​រស្មីកម្ពុជា)

Source: ប្រវត្ដិសាស្រ្ដ





Comments
Loading...