Ultimate magazine theme for WordPress.

ប្រាសាទ​ថ្មបាយក្រៀម​ក្បែរ​ប្រាសាទ​តាមាន់តូច​ជា​ស្នា​ព្រះហស្ដ​មហា​វីរក្សត្រ​ជ័យវរ្ម័នទី​៧





ធម្មសាលា​នៅ​មុខ​ប្រាសាទ​តាមាន់តូច គេ​អាច​ហៅ​ថា​ផ្ទះសំណាក់​ក៏​បាន

យោង​តាម​ការ​សិក្សា​ស្រាវជ្រាវ​ផ្នែក​ខាង​ប្រវត្ដិសាស្ដ្រ​កម្ពុជា បណ្ឌិត​មីសែល​ ត្រាណេ បាន​ប្រាប់​ឲ្យ​ដឹង​ថា​ ដូច​ករណី​ធម្មសាលា​នៅ​ប្រាសាទ​បន្ទាយឆ្មារ និង​ប្រាសាទ​ព្រះខ័ន​កំពង់ស្វាយ ខេត្ដ​បន្ទាយមានជ័យ​និង​ខេត្ដព្រះវិហារ​ដែរ ​ប្រាសាទ​មួយ​ធ្វើ​អំពី​ថ្មបាយក្រៀម​ដែល​ស្ថិត​នៅ​ក្បែរ​ប្រាសាទ​តាមាន់តូច គឺជា​ស្នា​ព្រះ​ហស្ដ​របស់​ព្រះ​មហា​វីរក្សត្រ​ជ័យវរ្ម័ន​ទី​៧ ។​ នោះ​គឺជា​ធម្មសាលា​ឬ​គេ​ហៅ​ថា​ផ្ទះសំណាក់​សម្រាប់​ទុក​ឲ្យ​អ្នកដំណើរ​ទី​ជិត​ឆ្ងាយ​ឈប់​សម្រាកកាយ ។​

បណ្ឌិត​ជំនាញ​ខាង​ប្រវត្ដិសាស្ដ្រ​ខ្មែរ​បាន​ឲ្យ​ដឹង​ទៀត​ថា​ តាម​ពិត​ទៅ​ប្រាសាទ​ថ្មបាយក្រៀម​នេះ​គឺជា​ផ្ទះសំណាក់​មួយ​ក្នុង​ចំណោម​ផ្ទះសំណាក់​ចំនួន​១២១ ​ដែល​មាន​ចារ​ក្នុង​សិលាចារឹក​ប្រាសាទ​ព្រះខ័ន​នៅ​ខេត្ដ​សៀមរាប​អង្គរ ។​

ជា​ទូទៅ​អគារ​ធម្មសាលា​នេះ​ដែល​មាន​ទំហំ​៤,៥​ម៉ែត្រ ​ផ្នែក​ទទឹង និង​បណ្ដោយ​១៤,៥​ម៉ែត្រ​ គឺ​បាន​ដើរតួ​នាទី​យ៉ាង​សំខាន់​បំផុត​នៅ​ក្នុង​អតីតកាល​សម្រាប់​យកអាសា​អ្នកដំណើរ​ទី​ជិត​ឆ្ងាយ ដែល​បាន​ធ្វើ​ធម្ម​យាត្រា​ឬ​អញ្ជើញ​មក​កាន់​មន្ទីរពេទ្យ ឬ​អរោគ្យ​សាលា​ដើម្បី​ថែរក្សា​ឬ​ព្យាបាល​រោគ​ដែល​ស្ថិត​ក្បែរ​ទីនោះ ។​

យោង​តាម​ខ្លឹមសារ​នៃ​សិលាចារឹក​ខាងលើ​ លោក​មីសែល ត្រាណេ បាន​បញ្ជាក់​ថា​មាន​ការ​ចែក​អុស​សម្រាប់​កាប់​ដុត​ភ្លើង​អាំង នៅ​ពេល​យប់​ឬ​ពេល​ព្រឹក​ឡើង​ថែម​ទៀត​ផង ពីព្រោះ​ទីនោះ​ជា​តំបន់​ខ្ពង់រាប​ប្រកបដោយ​អាកាសធាតុ​ត្រជាក់​ខ្លាំង ។​

សរុប​មក​ ប្រាសាទ​ថ្មបាយក្រៀម​នេះ​គឺជា​សំណង់​ស្ថាបត្យកម្ម​ខ្មែរ ដែល​បាន​សាងសង់​ឡើង​នៅ​ក្នុង​រជ្ជកាល​របស់​ព្រះបាទ​ជ័យវរ្ម័ន​ទី​៧​ នៅ​ក្នុង​សតវត្ស​ទី​១២​នៃ​គ្រិស្ដសករាជ ក្នុង​ពេល​ដែល​ទ្រង់​នៅ​មាន​ព្រះ​ជន្មាយុ​នៅឡើយ​ ដើម្បី​អភិវឌ្ឍន៍​ប្រទេស​ជាតិខ្មែរ​តាម​រយៈ​វិស័យ​សុខាភិបាល ។ ទាំង​អរោគ្យ​សាលា​ទាំង​ធម្មសាលា​គឺ​បាន​ឆ្លុះ​បញ្ចាំង​ឲ្យ​យើង​ឃើញ​នូវ​ប្រព័ន្ធ​គ្រប់គ្រង​ជាតិ​របស់​អតីត​ព្រះមហាក្សត្រ​ខ្មែរ​ដ៏​ខ្លាំងពូកែ​នា​សម័យ​អង្គរ​ដ៏​រុងរឿង​យ៉ាង​ប្រាកដ ៕

ប្រភពៈ  សាលអាន​ថ្ងៃ​ទី​០៣/០៩/២០០៨ (ដកស្រង់​ពី​កាសែត​រស្មីកម្ពុជា)

Source: ប្រវត្ដិសាស្រ្ដ





Comments
Loading...