Ultimate magazine theme for WordPress.

សៀម​ជា​កុលសម្ព័ន្ធ​មួយ​ឬ​ជាតិ​សាសន៍​មួយ​មាន​ប្រទេស​ពិតប្រាកដ





លោក​សាស្ដ្រាចារ្យ​បណ្ឌិត រស់ ចន្ដ្រាបុត្រ អនុប្រធាន​រាជ​បណ្ឌិតសភា​កម្ពុជា​និង​ជា​អ្នក​ស្រាវជ្រាវ​ប្រវត្ដិសាស្ដ្រ​ខ្មែរ​ មាន​ប្រសាសន៍​ថា​ សៀម​ជា​កុលសម្ព័ន្ធ​មួយ​ដែល​ជា​អ្នកបម្រើ​និង​ជា​កងទ័ព​ស្ដេច​ខ្មែរ​ព្រះបាទ​សូរិយាវរ្ម័ន​ទី​២ ដែល​បាន​សោយរាជ្យ​ពី​ឆ្នាំ​១១១៣​ ដល់​ឆ្នាំ​១១៥០ ។ លោក​បន្ត​ថា​ការ​ស្គាល់​ជនជាតិ​នេះ​ច្បាស់ ត្រូវ​បាន​រក​ឃើញ​នៅ​លើ​សិលាចារឹក​មួយ​នៅ​ប្រាសាទ​អង្គរតូច នៅ​ថែវ​ទី​២ ជ្រុង​ខាងត្បូង​ឆៀង​ខាងកើត ប៉ុន្ដែ​គួរ​ឲ្យ​សោកស្ដាយ​សិលា​ចារឹក​នោះ​ត្រូវ​គេ​លួច​គាស់​យក​ទៅ​បាត់​កាលពី​ពេល​ថ្មីៗ​នេះ ។

លោក​បន្ត​ដោយ​គូសបញ្ជាក់​ថា ក្នុង​អតីតកាល​សៀម​ជា​ក្រុម​មួយ​ដែល​ស្ថិត​នៅ​ក្បែរ​ព្រះមហាក្សត្រ​ខ្មែរ ពួក​គេ​ជា​អ្នកបម្រើ​អ្នក​រៀបចំ​អាហារ និង​ជា​កងទ័ព​ការពារ​និង​ជួយ​រៀបចំ​ទឹកដី​ចក្រភព​ខ្មែរ ។​

លោក​សាស្ដ្រាចារ្យ​បណ្ឌិត​រស់ ចន្ដ្រាបុត្រ បាន​បន្ត​ឲ្យ​ដឹង​ថា​ ចំណែក​ពួក​ថៃ​គឺជា​កុលសម្ព័ន្ធ​មួយ​ដែល​ចុះ​មក​ពី​ភាគ​ខាងត្បូង​ប្រទេស​ចិន​នៅ​ពេល​ដែល​ពួក​ម៉ុងហ្គោល​វាយ​ប្រទេស​នេះ ហើយ​ជនជាតិ​នេះ បាន​បែក​ជា​ពីរ​ក្រុម​ មួយ​ក្រុម​មក​កាន់​ទឹកដី​កម្ពុជា​ដែល​ជា​ប្រទេស​ថៃ​បច្ចុប្បន្ន​នេះ និង​មួយ​ក្រុម​ទៀត​ចុះ​ទៅ​ប្រទេស​ឡាវ ។​

លោក​បន្ថែម​ថា ការ​មក​រស់នៅ​លើ​ទឹកដី​ខ្មែរ ​ជនជាតិ​នេះ​បាន​ទទួលយក​ប្រពៃណី​ទំនៀមទម្លាប់ វប្បធម៌ អរិយធម៌​ខ្មែរ និង​មួយ​ចំណែក​ទទួល​ពី​វប្បធម៌​ជនជាតិ​ចិន ។​

អ្វី​ដែល​គួរ​ឲ្យ​កត់សម្គាល់់​នៅ​ពេល​ជនជាតិ​ថៃ​ចុះ​ពី​ស្រុក​ចិន​មក​បាន​រួបរួម​គ្នា​ជាមួយ​ជនជាតិ​សៀម​ដែល​នៅ​បម្រើ​ខ្មែរ ដោយ​បាន​ចាប់​ផ្ដើមកសាង​កម្លាំង​ទ័ព​នៅ​សតវត្សរ៍​ទី​៩ ទៅ​សតវត្សរ៍​ទី​១០​ និង​ចាប់ផ្ដើម​វាយ​ជាមួយ​នគរ​ខ្មែរ​ដើម្បី​ដណ្ដើម​ឯករាជ្យ​ពី​ខ្មែរ​ដោយ​មាន​ការ​ចូលរួម​ពី​រាមាកំហែង ដែល​ជា​អ្នកមាន​ឥទ្ធិពល​ក្នុង​នគរ​ខ្មែរ​ក្នុង​សម័យ​នោះ ដែល​មាន​បំណង​ចង់​ផ្ដាច់​ទឹកដី ។ បន្ទាប់​ពី​ធ្វើសង្គ្រាម​ជាមួយ​ខ្មែរ ថៃ​បាន​បង្កើត​ឡើង​នូវ​ប្រទេស​និង​រាជធានី​លើក​ដំបូង​ឈ្មោះ​សុខោទ័យ ដែល​ជា​អរុណោទ័យ​ក្នុង​ការ​ចាប់ផ្ដើម​ភាព​ថ្កុំថ្កើង​របស់​ប្រទេស​នេះ ។​

បន្ទាប់​ពី​ការ​បែកបាក់​សង្គម​ជាតិខ្មែរ ប្រទេស​ថៃ​បាន​បង្កើន​ការ​វាយលុក​ចូល​ក្រុង​អង្គរ​នៅ​សតវត្សរ៍​ទី​១៣ និង​ទី​១៤ រហូត​ដល់​កម្ពុជា​ដែល​មាន​ស្ដេច​មួយ​ព្រះ​អង្គ​ព្រះ​នាម​ចៅ​ពញាយ៉ាត បាន​រើ​រាជធានី​មក​កាន់​ទួល​បាសាន​ស្ថិត​ក្នុងស្រុក​ស៊ីធរកណ្ដាល ខេត្ដ​កណ្ដាល​សព្វថ្ងៃ​នេះ មុន​បន្ត​មក​កាន់​រាជធានី​ចតុមុខ​រហូត​ដល់​សព្វ​ថ្ងៃនេះ ។​

អ្នកប្រវត្ដិសាស្ដ្រ​ខ្មែរ​ឆ្នើម​ម្នាក់​ទៀត​ លោក​បណ្ឌិត​មីសែល ត្រាណេ បាន​មាន​ប្រសាសន៍​ពី​ប្រវត្ដិ​របស់​ជនជាតិ​សៀម​ថា​ សៀម​ឬ​ថៃ ជា​ជនជាតិ​មួយ​ដែល​មាន​អម្បូរ​ចិន ដែល​រស់នៅ​ក្នុង​ទីក្រុង​របស់​ខ្លួន​មួយ​ឈ្មោះ​ ណាន់ចាវ ក្នុង​ខេត្ដ​យូណាន ប្រទេស​ចិន​ភាគ​ខាងត្បូង ​ប៉ុន្ដែ​ក្រោយមក​ប្រទេស​ចិន​បានកម្ទេច​ក្រុង​របស់​ខ្លួន ហើយ​ពួក​គេ​បែក​ជា​បី​ក្រុម​ចុះ​មក​ទឹកដី​ខ្មែរ ឡាវ​និង​ប្រទេស​ភូមា​សព្វ​ថ្ងៃនេះ ។​

​លោក​បន្ត​ថា នេះ​ជា​ប្រវត្ដិ​មួយ​ដែល​ថៃ​មិន​អាច​ប្រកែក​បាន ហើយ​ប្រវត្ដិសាស្ដ្រ​ប្រាសាទ​និង​ស្ថានីយ​បុរេប្រវត្ដិសាស្ដ្រ​ក្នុង​ទឹកដី​ថៃ​សព្វ​ថ្ងៃ​ជា​របស់​នគរ​ខ្មែរ ។​ លោក​បន្ថែម​ថា អ្វី​ដែល​ថៃ​មាន​បច្ចុប្បន្ន​ជា​របស់​ខ្មែរ ទាំង​ទឹកដី ប្រពៃណី វប្បធម៌ អក្សរសាស្ដ្រ​រាប់​ពាន់​ពាក្យ​ជា​ពាក្យ​ខ្មែរ និង​អក្សរសិល្ប៍​ថៃ​មិន​គួរ​មាន​គំនិត​វាតទី​និយម​ខ្មែរ​ទេ​យើង​ជា​បងប្អូន​គ្នា ។​

លោក​ហ្សក ហ្សឺដេស អ្នក​ស្រាវជ្រាវ​បារាំង​បាន​សរសេរ​ក្នុង​ឆ្នាំ​១៩៥៦​ថា រាជធានី​របស់​សៀម​ស្ថិត​នៅ​លើ​ដី​ខ្មែរ​ផង​ដែរ ។

លោក​បណ្ឌិត​មីសែល ត្រាណេ បាន​មាន​ប្រសាសន៍​ឲ្យ​ដឹង​ថា​ សៀម​ដូរ​ឈ្មោះ​រាជធានី​ពី​ប្រទេស​ស្យាម​ឬ​សៀម​មក​ជា​ឈ្មោះ​ប្រទេស​ថៃឡង់ដ៍​ដូច​ពេល​សព្វ​ថ្ងៃនេះ គឺ​នៅ​ក្នុង​ឆ្នាំ​១៩៣៩ ។​

ការ​ដែល​ខ្មែរ​ឈាន​មក​ដល់​កម្រិត​ឱនភាព​ដល់​សព្វ​ថ្ងៃនេះ​បណ្ដាល​មក​ពី​មូលហេតុ​អ្វី​លោក​មីសែល ត្រាណេ​បាន​មាន​ប្រសាសន៍​ដោយ​គូសបញ្ជាក់​ថា ដោយសារ​ខ្មែរ​យើង​ធ្វេស​ប្រហែស គ្មាន​ឯកភាព​ជាតិ យើង​ចាញ់​យុទ្ធសាស្ដ្រ​គេ ដូច្នេះ យើង​ត្រូវ​រៀន​បទ​ពិសោធន៍​ប្រវត្ដិសាស្ដ្រ​នេះ​ទុកជា​មេរៀន ។​ លោក​បន្ថែម​ថា​ យើង​ត្រូវ​រួម​គ្នា​ជា​ធ្លុង​មួយ​ហើយ​យើង​មិន​ត្រូវ​បន្ទោស​គេ​ទេ ។​ ថៃ​ឆ្លើយ​មក​យើង​ថា​ដោយសារ​យើង​ធ្វេស​ប្រហែស​មិន​ឆ្លាត​ទើប​គេ​យក គេ​វាតទី​បែប​នេះ ។​

កត្ដា​អ្វីខ្លះ​ដែល​ធ្វើ​ឲ្យ​ចក្រភព​ខ្មែរ​អន់​ថយ​ពី​ធ្លាប់​មាន​ដី​ជាង ១​លាន​គីឡូ​ម៉ែត្រការ៉េ​មក​ដល់ ១៨១.០៣៥​គីឡូ​ម៉ែត្រការ៉េ​សព្វ​ថ្ងៃនេះ​ លោក​សាស្ដ្រាចារ្យ​បណ្ឌិត​រស់ ចន្ដ្រាបុត្រ បាន​មាន​ប្រសាសន៍​ដោយ​គូសបញ្ជាក់​ថា ​ក្រោយ​រាជ្យ​ព្រះបាទ​ជ័យវរ្ម័ន​ទី​៧ និង​ព្រះបាទ​ជ័យវរ្ម័ន​ទី​៨ នគរ​ខ្មែរ​បាន​បែកបាក់ ក្នុង​នោះ​ការ​ដូរ​សាសនា​ពី​ព្រះពុទ្ធ​សាសនា​មហាយាន​និង​ព្រហ្មញ្ញសាសនា មក​ជា​ព្រះពុទ្ធ​សាសនា​បែប​ថេរវាទ ​ប្រៀប​បីដូច​កាំបិត​ចិត​ដង​ឯង ការ​ដែល​សៀម​ខ្ទប់​សេដ្ឋកិច្ច​ខ្មែរ​ព្រោះ​បើ​យើង​មើល​ផែនទី​ប្រទេស​សៀម​ជាប់​ប្រទេស​ម៉ាឡាយូ​ (ម៉ាឡេស៊ី​សព្វថ្ងៃ) ធ្វើ​ឲ្យ​សៀម​រាំង​ខ្ទប់​ច្រក​សេដ្ឋកិច្ច​នា​ពេល​នោះ ។​

លោក​បន្ត​ថា​ ដោយសារ​ការ​រាំង​ខ្ទប់​ច្រក​សេដ្ឋកិច្ច​ពី​ថៃ ខ្មែរ​ងាក​ទៅ​រក​ច្រក​សមុទ្រ​ស្ថិត​ក្នុង​ទឹកដី​កម្ពុជា​ក្រោម​ ប៉ុន្ដែ​នៅ​ពេល​ដែល​យួន​យក​ទឹកដី​កម្ពុជា​ក្រោម​ទៀត កាន់តែ​បណ្ដាល​ឲ្យ​ខ្មែរ​ត្រូវ​កាត់​ផ្ដាច់​ពី​ពិភព​ខាងក្រៅ​ បាន​ធ្វើ​ឲ្យ​ប្រទេស​កាន់តែ​ទន់ខ្សោយ​ទៅៗ​រហូត​ដល់​សម័យ​ព្រះបាទ​អង្គឌួង​ព្រះ​អង្គ​បាន​រៀបចំ​ឲ្យ​មាន​ផែ​សមុទ្រ​ក្នុង​ខេត្ដកំពត​សព្វ​ថ្ងៃនេះ ។​

ក្នុង​សង្គម​កម្ពុជា​បច្ចុប្បន្ន​ លោក​បណ្ឌិត​មីសែល ត្រាណេ​បាន​បន្ត​ដោយ​លើក​ឡើង​ថា​ ខ្មែរ​ទើប​ចប់​ពី​សង្គ្រាម​ខ្ញុំ​ចង់​ឲ្យ​យើង​រួបរួម​គ្នា​ជា​ធ្លុង​មួយ​ព្រោះ​យើង​ល្មម​រៀន​មេរៀន​ប្រវត្ដិសាស្ដ្រ​គ្រប់គ្រាន់​ហើយ ។ លោក​បន្ថែម​ថា​ បក្ស​អាច​ស្លាប់​នៅ​ថ្ងៃ​ណាមួយ​បាន ប៉ុន្ដែ​ជាតិ​មិន​អាច​ស្លាប់ មិន​អាច​រលាយ​បាន​ទេ​ ដូច្នេះ​យើង​ត្រូវការ​រួបរួម ត្រូវ​តែ​បក្ស​ទាំងអស់​ចូលរួម​គ្នា ត្រូវ​គិតដល់​ឧត្ដម​ប្រយោជន៍​ជាតិ ។ គិត​បក្ស​គិត​ចុះ ព្រោះ​ជា​សិទ្ធិ​សេរីភាព ប៉ុន្ដែ​គិត​ជាតិ​ជា​ធំ ។​

លោក​បន្ត​ដោយ​សង្កត់ធ្ងន់​ថា​ បើ​យើង​បែកបាក់​យើង​ត្រូវ​តែ​រៀន​តាម​ថៃ​ដែល​គេ​បែកបាក់​ដើម្បី​ផលប្រយោជន៍​រួម​របស់​ជាតិ​គេ ​ប៉ុន្តែ​រៀន​តាម​ខាង​ត្រូវ​កុំ​រៀន​តាម​ខាង​ខុស ៕

ប្រភពៈ  សាលអាន​ថ្ងៃ​ទី​០៨/១០/២០០៨ (ដកស្រង់​ពី​កាសែត​រស្មីកម្ពុជា)

Source: ប្រវត្ដិសាស្រ្ដ





Comments
Loading...