Ultimate magazine theme for WordPress.

ប្រវត្តិ​វត្ត​បច្ឆា​ខេត្ត​ក្រចេះ





ព្រះវិហារ​វត្ត​បច្ឆា

វត្ត​មួយ​ដែល​ឈ្មោះថា​ «បច្ឆា» គិត​ដល់​បច្ចុប្បន្ន​មាន​អាយុកាល​ ៩២​ឆ្នាំ ។ ដូច្នេះ​អារាម​មួយ​នេះ​អាច​ចាត់ទុកថា គឺជា​អារាម​ចំណាស់​មួយ​ដែរ​ក្នុង​ចំណោម​វត្ត​អារាម​ដទៃទៀត​នៅ​ក្រុងក្រចេះ ខេត្តក្រចេះ ។​

តាម​ការបញ្ជាក់​របស់​អ្នក​ដែល​ដឹង​រឿងរ៉ាវ​នៃ​ការកកើត​វត្ត​បច្ឆា បាន​ឲ្យ​ដឹង​ថា វត្ត​បច្ឆា​បាន​កកើត​កាលពី​ឆ្នាំ​១៩២៩​ ដែល​ផ្ដើមកសាង​វត្ត​ដោយ​ឧបាសិកា ឆេង គីម ដែល​ត្រូវជា​ជីដូន​របស់​លោក​បណ្ឌិត អ៊ឹម ឈុនលឹម អតីត​ជា​រដ្ឋមន្ត្រីក្រសួង​រៀបចំ​ដែនដី​នគរូបនីយកម្ម​និង​សំណង់​ និង​​បច្ចុប្បន្ន​ជា​ប្រធាន​ក្រុមប្រឹក្សាធម្មនុញ្ញ ។ ​កាលណោះ​ លោកយាយ​ ឆេង ​គីម ​បាន​កសាង​ទី​ប៉ាឆា​ដំបូង​គេ​ទុកជា​ទាន​សម្រាប់​បូជាសព ។​ ក្រោយ​មក​ទៀត ប្រជាពលរដ្ឋ​ក៏បាន​យក​ទីតាំង​បរិវេណ​វត្ត​បច្ឆា​នេះ​ធ្វើជា​ផ្សារ​លក់ដូរ ។​

ប្រភព​ដដែល​បន្តថា លុះ​មកដល់​ឆ្នាំ​១៩៩១ ​អាជ្ញាធរ​បាន​ប្ដូរ​ទីតាំង​ផ្សារ​ចេញពី​ទី​វត្ត​ឲ្យ​ទៅ​លក់ដូរ​នៅក្បែរ​មាត់ទន្លេ​ ដែល​យើង​មើល​ឃើញ​សព្វថ្ងៃនេះ​វិញ ។ ចាប់​ពី​ពេល​នោះ​មក​ក៏​ផ្ដើម​រៀបចំ​កសាង​វត្ត​ដោយ​កសាង​ព្រះវិហារ ដោយ​ដាក់​ឈ្មោះថា វត្ត​បច្ឆា ដែលជា​ការបន្ត​មរតក​ប្រវត្តិ​នៃ​ការកកើត​ទីតាំង​វត្ត​នេះ ។ ចាប់ពី​ការ​កសាង​ជា​វត្ត ក៏​មាន​ព្រះសង្ឃ ដូនជី តាជី គ្រប់គ្រង ក្លាយជា​វត្ត​មួយ​សមរម្យ​ជាទី​សក្ការៈសម្រាប់​គោរពបូជា​របស់​ពុទ្ធសាសនិកជន​ និង​ប្រជាពលរដ្ឋ​ទូទៅ​រហូត​មក​ទល់​បច្ចុប្បន្ន ។​

ព្រះចៅអធិការ​វត្ត​បច្ឆា​សព្វថ្ងៃ​នេះ​នាម ធឹង ច័ន្ទត្រា មាន​សង្ឃដីកា​ថា ដើម្បី​ចូលរួម​ចំណែក​អភិវឌ្ឍ​ឲ្យ​មាន​ការរីក​ចម្រើន​ក្នុង​វិស័យ​ព្រះពុទ្ធសាសនា​នៅ​ព្រះរាជាណាចក្រ​កម្ពុជា​ ព្រះអង្គ​បាន​ប្រឹងប្រែង​ដឹកនាំ​ព្រះសង្ឃ ជាមួយ​គណៈកម្មការ​វត្ត និង​បិណ្ឌ​បាត្រ​ដល់​ពុទ្ធបរិស័ទ ឯកឧត្តម លោកជំទាវ អស់លោក លោកស្រី​ជិត​ឆ្ងាយ​ ទាំង​ក្នុង និង​ក្រៅ​ប្រទេស​ដែល​មាន​សទ្ធា​ជ្រះថ្លា ជួយ​បច្ច័យ និង​សម្ភារ​កសាង​ផ្សេងៗ ។ ​ដោយ​ទទួល​បាន​នូវ​ការ​ចូលរួម​ទាំង​អស់​នេះ ដែល​បាន​ធ្វើ​ឲ្យ​វត្ត​បច្ឆា​មាន​ការ​ប្រែប្រួល​មុខមាត់​ថ្មី​ជា​បណ្ដើរៗ គួរ​ជាទី​បណ្ដុះ​នូវ​ទឹកចិត្ត​មេត្តា​ ​ករុណា ឧបេក្ខា និង​ការ​សាមគ្គី​គ្នា​ក្រោម​ម្លប់​នៃ​សន្តិភាព ។

ដោយ​បង្ហាញ​ជា​តឹកតាង ​ព្រះចៅអធិការ​បាន​សង្ឃដីកា​ថា សមិទ្ធផល​ដែល​សម្រេច​បាន​រួមមាន ៖ ព្រះវិហារ​តូច​ល្មម​ជាទីគោរព​បូជា សាលាឆាន់ សាលា​បាលី កុដិ របង ព្រះពុទ្ធរូប ផ្លូវ​បេតុង​ក្នុង​វត្ត ។​ ប៉ុន្តែ​សេចក្តី​ត្រូវការ​ដើម្បី​កសាង​ដំណែល​ដែល​មាន​ចំណាស់​ជិត​ ១០០​ឆ្នាំ ​​នៅ​តែ​មាន ។ នោះ​មិនមែន​សម្រាប់​ត្រឹមតែ​បំពេញ​ឲ្យ​សេចក្តី​ត្រូវការ​ក្នុង​វិស័យ​ព្រះពុទ្ធសាសនា​ប៉ុណ្ណោះ​ទេ តែ​ក៏​ជា​ការ​រំលឹក​នឹក​ដល់​ឧបាសិកា​ ឆេង គីម ដែលមាន​សទ្ធា​ជ្រះថ្លា​បង្កើត​ឡើង​នូវ​ទីតាំង​អារាម​នេះ​ផង​ដែរ ។​

ព្រះចៅអធិការ​វត្ត​មាន​សង្ឃដីកា​បន្ត​ថា នៅ​ចំពោះមុខ​នេះ​ដើម្បី​សម្រេច​ផែនការ​បង្កើត​សមិទ្ធផល​បន្ថែម​ទៀត ដោយ​មាន​ការ​ស្រុះស្រួល​មតិ​គ្នា​ជាមួយ​គណៈកម្មការ​វត្ត​ផង ព្រះអង្គ​បាន​និង​កំពុង​បន្ត​កសាង​ដងទង់​ចំនួន​មួយ​គូ ស្រះទឹក លម្អ​សួន និង​របង​បន្ថែម​ព័ទ្ធ​ជុំវិញ ។ ការ​ចូលរួម​កសាង​វត្ត​អារាម​នឹង​ទទួល​បាន​នូវ​ផល្លា​អានិសង្ស​ច្រើន​ក្រៃលែង ៕

ប្រភពៈ  កាសែត​រស្មីកម្ពុជា ១៧/១២/២០២១

Source: ប្រវត្ដិសាស្រ្ដ





Comments
Loading...