Ultimate magazine theme for WordPress.

ដាយណូស័រ​ស៊ីសាច់​និង​រុក្ខជាតិ​នៅ​លើ​ជញ្ជាំង​អង្គរ​និង​តាព្រហ្ម





រូបចម្លាក់​ដាយណូស័រ​នៅ​ប្រាសាទ​តាព្រហ្ម​និង​នៅ​ថែវ​ខាងត្បូង​ស្លាប​ខាងលិច​ប្រាសាទ​អង្គរវត្ដ

ចម្លាក់​សត្វ​ចម្លែក​ដែល​មាន​រាងដូចជា​សត្វ​ដាយណូស័រ​បាន​ត្រូវ​បុរាណវិទ្យា​ខ្មែរ​ពញ្ញាក់​ប្រាប់​ថា​ គេ​អាច​មើលឃើញ​នៅ​ថែវ​ខាងត្បូង​ស្លាប​ខាងលិច និង​ថែវ​ខាងជើង​ស្លាប​ខាងកើត​នៃ​ប្រាសាទ​អង្គរវត្ដ ។ ក្រុម​បុរាណវិទ្យា​ខ្មែរ​និយាយ​ថា ចម្លាក់​សត្វ​ចម្លែក​ដូច​ដាយណូស័រ​នេះ​យើង​បានឃើញ​យូរ​ហើយ ប៉ុន្ដែ​គ្មាន​នរណា​ចាប់អារម្មណ៍ ។ រូប​សត្វ​ចម្លែក​នោះ​ក៏​មាន​ឆ្លាក់​នៅ​ឯ​ប្រាសាទ​បាយ័ន​ផង​ដែរ ។

លោក ​ហម គឹមសុន ប្រធាន​នាយកដ្ឋាន​បុរាណវិទ្យា​និង​បុរេប្រវត្ដិ​វិទ្យា​ និង លោក វឿន វុទ្ធី មន្ដ្រី​បច្ចេកទេស​នៃ​ក្រសួង​វប្បធម៌​និង​វិចិត្រសិល្បៈ​ បាន​រួម​ដំណើរ​ជាមួយ​អ្នក​យក​ព័ត៌មាន​ទៅ​ពិនិត្យ​និង​សិក្សា​រូបភាព​សត្វ​ចម្លែក​នោះ​កាលពី​ល្ងាច​ថ្ងៃ​ទី​២ ខែកុម្ភៈ​ ឆ្នាំ​២០០៩ នេះ​នៅ​ប្រាសាទ​ទាំង​ពីរ ។

លោក​ហម គឹមសុន បាន​មាន​ប្រសាសន៍​ថា​ សត្វ​ចម្លែក​ប្រភេទ​ទី​១​ដែល​ខ្មែរ​ឆ្លាក់​នោះ​ រួម​មាន ​សត្វ​ចំនួន​ពីរ​ក្បាល​នៅ​ជាប់​ជញ្ជាំង​ប្រាសាទ​អង្គរវត្ដ​ត្រង់​ថែវ​ខាងត្បូង​ស្លាប​ខាងលិច ។ តាម​រូប​នេះ​យើង​ជឿ​ថា​វា​ជា​ប្រភេទ​សត្វ​ស៊ី​រុក្ខជាតិ​ជា​អាហារ ។ សត្វ​ប្រភេទ​នេះ​មាន​ជើង​ក្រោយ​និង​ជើង​មុខ​វែង​ស្មើគ្នា ។ លោក​បាន​បន្ត​ថា ​ប្រភេទ​សត្វ​ទី​១ ​គេ​ឆ្លាក់​នៅ​ក្នុង​សតវត្សរ៍​ទី​១២ ។

ដោយឡែក​សត្វ​ចម្លែក​មាន​រាងដូចជា​ដាយណូស័រ​មួយ​ប្រភេទ​ទៀត​គឺ​មាន​ជើង​ក្រោយ​វែង​ជាង​ជើង​មុខ ។ ប្រភេទ​សត្វ​នេះ​យើង​បាន​ឃើញ​នៅ​ថែវ​ខាងជើង​ស្លាប​ខាងកើត​នៃ​អង្គរវត្ដ ។ វា​ជា​ប្រភេទ​ស៊ីសាច់​ជា​អាហារ ។ រូបចម្លាក់​សត្វ​ប្រភេទ​ដូច​ដាយណូស័រ​ប្រភេទ​ទី​២​នេះ​ត្រូវ​បាន​គេ​ឆ្លាក់​នៅ​សតវត្សរ៍​ទី​១៦ ។

លោក​ហម គឹមសុន បាន​បន្ត​ទៀត​ថា​ ប្រភេទ​សត្វ​ចម្លែក​មាន​រាង​ដូច​ដាយណូស័រ​ទី​៣ គឺ​រក​ឃើញ​នៅ​លើ​ជញ្ជាំង​ប្រាសាទ​បាយ័ន​ត្រង់​ថែវ​ទី​២​ខ្លោងទ្វារ​ខាងលិច ។ សត្វ​ប្រភេទ​នេះ​គឺជា​ប្រភេទ​សត្វ​ស៊ី​រុក្ខជាតិ​ជា​អាហារ ។ ដាយណូស័រ​ប្រភេទ​ទី​៣ នៅ​ប្រាសាទ​បាយ័ន​ជា​ប្រភេទ​សត្វ​ខ្នង​កោង មាន​បន្លា​ចាប់ពី​ក្បាល​ដល់​កន្ទុយ​ ហើយ​សត្វ​នេះ​ជា​សត្វ​មាន​ប្រវែង​បណ្ដោយ​ ៩​ម៉ែត្រ ​ឯណោះ ។ សត្វ​ប្រភេទ​ទី​៣​ដែល​រក​ឃើញ​នេះ​ គេ​ឆ្លាក់​នៅ​ក្នុង​សតវត្សរ៍​ទី​១៣ ។

លោក​វឿន វុទ្ធី មន្ដ្រី​បច្ចេកទេស​នាយកដ្ឋាន​បុរាណវិទ្យា​និង​បុរេប្រវត្ដិ​វិទ្យា​ បាន​និយាយ​ឲ្យ​ដឹង​ដែរ​ថា​ សត្វ​ចំនួន​៣​ប្រភេទ​ដែល​យើង​ឃើញ​ឆ្លាក់​តាម​ប្រាសាទ​នេះ មាន​អ្នកខ្លះ​បានឃើញ​ជា​យូរ​មក​ហើយ ​ប៉ុន្ដែ​គ្រាន់តែ​មិន​ចាប់អារម្មណ៍​ប៉ុណ្ណោះ ។ ​លោក​បាន​បន្ត​ថា​ រូប​សត្វ​ចម្លែក​រាង​ដូច​ដាយណូស័រ​ខាងលើ​នេះ​ កាលពី​ពេល​ថ្មីៗ​កន្លង​ទៅ​មាន​និស្សិត​មួយ​ក្រុម​បាន​ចុះ​កម្មសិក្សា​ ហើយ​បាន​ប្រទះ​ឃើញ ។ ក្រុម​និស្សិត​នោះ​បាន​ថតរូប​រាយការណ៍​ឲ្យ​ផ្នែក​ជំនាញ​ក្រសួង ។

លោក​វឿន វុទ្ធី បាន​បញ្ជាក់​ថា​ ដើម្បី​ចុះ​ពិនិត្យ​ស្រាវជ្រាវ​ឲ្យ​បាន​ច្បាស់​ ទើប​ក្រុម​បច្ចេកទេស​ក្រសួង​ធ្វើ​ដំណើរ​មក​ពេល​នេះ​ពិនិត្យ​ឲ្យ​បាន​ច្បាស់​អំពី​លក្ខណៈ​ប្រភេទ​ចម្លាក់​ដែល​មាន​រាង​ដូច​ដាយណូស័រ​នេះ ។

តាម​ការ​អង្កេត និង​ពិនិត្យ​ដោយ​ផ្ទាល់​ភ្នែក ​ផ្នែក​ជំនាញ​បញ្ជាក់​ថា​ សត្វ​ទាំងអស់​ដែល​ឃើញ​នេះ គឺជា​ប្រភេទ​សត្វ​រាង​ដូច​សត្វ​ដាយណូស័រ​យ៉ា​ង​ពិតប្រាកដ ។

ដោយឡែក​លោក​ហម គឹមសុន វិញ​បាន​និយាយ​ដែរ​ថា​ កាលពី​៣​ឆ្នាំ​មុន ​មាន​វេបសាយ​មួយ​បាន​ចុះ​ផ្សាយ​អំពី​ប្រភេទ​សត្វ​រូបរាង​ដាយណូស័រ​នៅ​ប្រាសាទ​អង្គរវត្ដ និង​នៅ​ប្រាសាទ​បាយ័ន​នេះ​ដែរ​ ប៉ុន្ដែ​គេ​ផ្សាយ​មាន​លក្ខណៈ​ខុស​ច្រើន​ណាស់ ។ លោក​បាន​បន្ត​ថា​ សត្វ​ដាយណូស័រ​ឆ្អឹង​របស់​វា​ត្រូវ​បាន​គេ​ស្រាវជ្រាវ​រក​ឃើញ​នៅ​លើ​ពិភពលោក​ដំបូង​ក្នុង​សតវត្សរ៍​ទី​១៩ ។ ប៉ុន្ដែ​នៅ​កម្ពុជា​គឺ​មាន​ចម្លាក់​រូប​ដាយណូស័រ​នៅ​ចន្លោះ​សតវត្សរ៍​ទី​១២ ទៅ​សតវត្សរ៍​ទី​១៦ ។

លោក​បាន​បន្ត​ទៀត​ថា​ នៅ​អាស៊ី​មាន​ប្រទេស​វៀតណាម ឡាវ ចិន សៀម គេ​បាន​រក​ឃើញ​ឆ្អឹង​ដាយណូស័រ​អស់ហើយ​តាម​រយៈ​ធ្វើ​កំណាយ ។ ប៉ុន្ដែ​សម្រាប់​កម្ពុជា​យើង​មិន​ទាន់​បាន​រក​ឃើញ​ឆ្អឹង​សត្វ​ប្រភេទ​នេះ​តាម​រយៈ​ធ្វើ​កំណាយ​នៅ​ឡើយ ។

ពាក់ព័ន្ធ​នឹង​សំណួរ​សួរ​ថា​កម្ពុជា​អាច​មាន​ប្រភេទ​សត្វ​ដាយណូស័រដែរ​ឬទេ​កាលពីមុន ផ្នែក​ជំនាញ​ខាងលើ​និយាយ​ថា​ មិន​អាច​បញ្ជាក់​បាន​ឡើយ​ ព្រោះ​យើង​មិន​ទាន់​រក​ឃើញ​ឆ្អឹង​សត្វ​ប្រភេទ​នេះ​តាម​រយៈ​ធ្វើ​កំណាយ ។

លោក​ក៏​បាន​បញ្ជាក់​ទៀត​ថា​ នៅ​កម្ពុជា​គេ​បាន​សន្មត​ថា​មាន​ប្រភេទ​សត្វ​ចំនួន​១០៨០​ប្រភេទ ។ យើង​បាន​រក​ឃើញ​ប្រភេទ​សត្វ​ជា​បន្តបន្ទាប់​ ហើយ​ប្រភេទ​សត្វ​នៅ​ប្រទេស​កម្ពុជា​អាច​មាន​លើស​ពី​ ១០៨០​ប្រភេទ ​ទៅ​ទៀត ។

ដាយណូស័រ​គឺជា​សត្វ​ឆ្អឹង​កង​ខ្នង​ដែល​មាន​ច្រើន​ជាងគេ​នៅ​ក្នុង​ប្រព័ន្ធ​អេកូឡូហ្ស៊ី​អស់​រយៈពេល​ជាង​ ១៦០​លាន​ឆ្នាំ មុន​ពេល​ដែល​វា​ភាគច្រើន​បាន​ផុត​ពូជ​កាលពី​ ៦៥​លាន​ឆ្នាំ​កន្លង​ទៅ ។ សត្វ​ស្លាប​ ១០.០០០​ប្រភេទ ​ត្រូវ​បាន​គេ​ចាត់ទុកជា​សត្វ​ដាយណូស័រ ៕

ប្រភពៈ  សាលអាន​ថ្ងៃ​ទី​០៤/០២/០៩ (ដកស្រង់​ពី​កាសែត​រស្មីកម្ពុជា)

Source: ប្រវត្ដិសាស្រ្ដ





Comments
Loading...